Eýrazııalyq damý banki Qazaqstanǵa 5,6 mlrd dollar ınvestıtsııa salyp, 104 jobany iske asyrǵan
Eýrazııalyq damý bankiniń (EADB) Qazaqstanǵa salǵan ınvestıtsııalarynyń kólemi 2022-2026 jyldarǵa arnalǵan strategııany iske asyrýdyń alǵashqy eki jylynyń qorytyndysy boıynsha jospardan 70%-ǵa artyp, $2,2 mlrd-tan asýy múmkin. Bul týraly QR Premer-Mınıstri Álıhan Smaıylovtyń banktiń basqarma tóraǵasy Nıkolaı Podgýzovpen kezdesýi barysynda belgili boldy, dep habarlaıdy QazAqparat.
Nıkolaı Podgýzov Qazaqstan EADB-den tartylǵan ınvestıtsııalar kólemi boıynsha kósh bastap turǵanyn atap ótti. Túrli salalarda $5,6 mlrd-qa 104 joba iske asyryldy. Bul kún jáne jel generatsııasynyń qurylysy, óńdeý sektory, hımııa ónerkásibi kásiporyndaryn, JEO, kóshelerdi jaryqtandyrý jelilerin jańǵyrtýǵa, sondaı-aq poıyzdardyń quramdas bólikteri parkin jańartýǵa, AÓK sektory kompanııalaryn damytýǵa, áýejaılar, magıstraldyq gaz qubyry qurylysyna jáne t. b. qatysty.
Bıylǵy maýsym aıynda Eýropa qaıta qurý jáne damý banki, Islam damý bankimen seriktestikte EADB-nyń qarjylandyrýymen salynǵan Úlken Almaty aınalma avtomobıl joly boıynsha kólik qozǵalysy ashyldy. Qazirgi ýaqytta EADB halyqaralyq seriktestermen birlesip, Almaty áýejaıyn keńeıtý men jańǵyrtýdy qarjylandyrýda. Oǵan qosa «Aıagóz – Baqty» t/j jelisi jáne Qazaqstan-Qytaı shekarasynda jańa shekara beketin salý jobalarynyń perspektıvasy da joǵary bolyp otyr. Jańa ınfraqurylym júk aınalymyn jylyna 20 mln tonnaǵa arttyrýǵa múmkindik beredi dep boljanýda.
Sonymen qatar Bank «Astrahan – Mańǵyshlaq» magıstraldyq sý qubyryn rekonstrýktsııalaýǵa jáne keńeıtý jobasyna da qatysýǵa nıetti. Jobanyń áleýmettik mańyzy joǵary ekenin eskere otyryp, arnaıy qarjylandyrý sharttaryn usyný josparlanyp otyr.
Álıhan Smaıylov EADB-nyń respýblıkanyń ınfraqurylymdyq damýyndaǵy róli mańyzdy ekenin jáne elimizdiń ulttyq damý maqsattaryn eskeretin tásiliniń durys ekenin atap ótti.
Aıta keteıik, Eýrazııalyq damý banki – eýrazııalyq keńistikte ınvestıtsııalyq qyzmetin júzege asyryp kele jatqan halyqaralyq qarjy uıymy. 17 jyldan astam ýaqyt boıy EADB qatysýshy elderdiń ekonomıkalyq baılanystaryn nyǵaıtýǵa jáne keńeıtýge, sondaı-aq jan-jaqty damýyna járdemdesip keledi. EADB-nyń jarǵylyq kapıtaly $7 mlrd-ty quraıdy. EADB portfelindegi negizgi úles kólik ınfraqurylymy, tsıfrlyq júıeler, jasyl energetıka, aýyl sharýashylyǵy, ónerkásip jáne mashına jasaý salalaryndaǵy ıntegratsııalyq áseri bar jobalarǵa tıesili. Bank óz jumysynda BUU-nyń Turaqty damý maqsattaryn jáne ESG qaǵıdattaryn basshylyqqa alady.
