Eýrazııalyq damý banki Qazaqstan ekonomıkasyna 5,2 mlrd dollar ınvestıtsııa saldy
ASTANA. KAZINFORM — Ártúrli nysanda jáne ártúrli merzimge tartylatyn ınvestıtsııalar Qazaqstan ekonomıkasyn sapaly transformatsııalaýǵa jaǵdaı jasaıdy. Bul týraly Eýrazııalyq damý bankiniń ıntegratsııalyq zertteýler ortalyǵynyń basshysy Aleksandr Zaboev ITS IDEAS 2026: Markets in Motion konferentsııasynda málimdedi.
— Qarajat ekonomıkaǵa ártúrli nysanda, ártúrli merzimge keledi, onyń ishinde uzaq merzimdi qarajattar da bar. Soǵan qaramastan, munyń bári burynǵy óńirdi, sonyń ishinde Qazaqstandy sapaly transformatsııalaýǵa jaǵdaı jasaıdy, — dedi Aleksandr Zaboev.
Onyń aıtýynsha, Qazaqstan birtindep kapıtal, saýda jáne kólik toǵysyna aınalyp keledi. Sonymen qatar óńirdegi tikeleı sheteldik ınvestıtsııalardyń qurylymy da ózgerip jatyr. Investıtsııalar burynǵydaı tek shıkizat sektoryna emes, óńdeý ónerkásibine, elektr energetıkasyna, kólik jáne agroónerkásiptik keshenderge baǵyttala bastady.
— TMD keńistigindegi ınvestıtsııalar aıasynda ǵana emes, Azııa elderinen Ortalyq Azııaǵa jáne álemniń basqa óńirlerinen keletin ınvestıtsııalar aıasynda da bolyp jatqan óte mańyzdy irgeli ózgeris, — dep atap ótti ol.
Zaboevtiń aıtýynsha, Eýrazııalyq damý banki 2022-2026 jyldarǵa arnalǵan strategııasyn iske asyrý aıasynda bank múshe memleketterdiń ekonomıkasyna 9,2 mlrd dollar ınvestıtsııa salǵan. Onyń 5,2 mlrd dollary Qazaqstan ekonomıkasyna baǵyttalǵan.
Sonymen qatar Qazaqstan Ortalyq Azııadaǵy sheteldik ınvestıtsııalar aǵynynyń negizgi núktesi bolyp qala beredi. Óńirdegi barlyq ınvestıtsııalar ósiminiń 55%-y Qazaqstannyń úlesine tıesili.
