Eýrazııalyq damý banki Almaty jylý elektr ortalyǵyn jańǵyrtý úshin ınvestıtsııa salmaq
Eýrazııalyq damý banki AIX alańynda Almaty jylý elektr ortalyǵyn jańǵyrtý úshin ınvestıtsııa salýdy josparlap otyr, dep habarlaıdy Kazinform «Astana» halyqaralyq qarjy ortalyǵynyń baspasóz qyzmetine silteme jasap.
Eýrazııalyq Damý Banki (EADB) ESG oblıgatsııalaryn shyǵarý jónindegi baǵdarlama sheńberinde AIX alańynda 236,8 mlrd teńgege deıingi mólsherde Qazaqstannyń iri elektr energetıkalyq holdıngi «Samuryq-Energo» AQ enshiles kompanııasy «Almaty elektr stantsııalary» AQ (AlES) shyǵaratyn ornyqty damý oblıgatsııalaryn (SLB) satyp alý nıetin jetkizdi. Oblıgatsııalardyń basty maqsaty - Almaty JEO-3 qaıta jańartýdy qarjylandyrý.
EADB-dan bólek, jobanyń negizgi nemese áleýetti ınvestorlary bolyp basqa damý ınstıtýttary men ekinshi deńgeıli bankter qatysa alady.
SLB «AlES» oblıgatsııalary Ortalyq Azııadaǵy ornyqty damý oblıgatsııalarynyń eń iri shyǵarylymy bolady dep kútilýde, al tabysty iske asyrylǵan joba Almaty aglomeratsııasynyń energetıkalyq júıesiniń tıimdiligin arttyryp qana qoımaı, óńirdiń ekologııasyn jaqsartýǵa úles qosady.
«Sońǵy jyldary búkil álemdegi ınvestorlar ınvestıtsııalyq sheshimder qabyldaý kezinde ESG ólshemsharttarynyń mańyzdylyǵyn kóbirek túsinýde. Nátıjesinde kóptegen kompanııalar ESG-di óz qyzmetine jáne bıznes strategııalaryna engize bastady. AIX qoljetimdi ónimder jelisi arqyly ornyqty damýǵa ınvestıtsııa salýǵa múmkindik bere otyryp, osy trendke saı bola alǵanyna qýanyshty», – dep atap ótti AIX Basqarma tóraǵasy Ásel Muqajanova.
«AlES» turaqty damý oblıgatsııalaryn shyǵarý baǵdarlamasy AHQO Jasyl qarjy ortalyǵynyń qoldaýymen daıyndaldy. JQO qajetti konsýltatsııalyq kómek kórsete otyryp, oblıgatsııalar shyǵarý sharttarynyń turaqty damý oblıgatsııalary qaǵıdattaryna (Second Party Opinion) sáıkestigi týraly táýelsiz qorytyndy jasady.
«AHQO ekologııalyq turaqty jobalarǵa ınvestıtsııalar tartýǵa múmkindik beretin ınnovatsııalyq qarjy quraldaryn engizýge umtylady. Osyndaı jańa qarjylyq ónimderdiń biri turaqty damýmen baılanysty oblıgatsııalar (Sustainability-linked bonds) desek qatelespeımiz. Biz búgin Qazaqstan Ortalyq Azııada kómirtegi izin tómendetý jónindegi jahandyq maqsattarǵa qol jetkizýge yqpal etetin osy oblıgatsııalar naryǵyn birinshi bolyp iske qosqanyn zor qýanyshpen habarlaımyz», - dedi AHQO Jasyl qarjy ortalyǵynyń dırektorlar keńesiniń tóraǵasy Danııar Kelbetov.
