«Eýrazııa júregine jol» halyqaralyq ekspedıtsııasy Qazaqstanǵa keldi

ASTANA. KAZINFORM – «Eýrazııa júregine jol» halyqaralyq ekspedıtsııasy Qazaqstandaǵy baǵdarlamasyn Aqtóbe oblysynan bastady. Bul týraly Týrızm jáne sport mınıstrligi málimdedi.

Ekspedıtsııanyń maqsaty – elimizdiń tarıhı-mádenı murasy men týrıstik áleýetin halyqaralyq deńgeıde tanytý. Baǵdarlamanyń alǵashqy kúninde qatysýshylar Aqtóbe qalasynda bolyp, óńirdiń mádenıetimen, dástúrimen tanysty. Delegatsııa quramy Martók aýdanyndaǵy panto-emdik sanatorııge baryp, tabıǵı emdik resýrstar men saýyqtyrý týrızmi baǵytyndaǵy múmkindikterge qanyqty.

Kelesi kúni ekspedıtsııanyń resmı ashylý rásimi ótti. Qatysýshylar etnomádenı is-sharalarǵa qatysyp, etnoaýyl ekspozıtsııasyn aralady. Sondaı-aq kıiz úıdiń sáýletimen, salt-dástúrmen, qolóner buıymdarymen tanysyp, ulttyq taǵamdardan dám tatty. Budan bólek, ekspedıtsııaǵa qatysýshylar úshin ulttyq sport túri – kókpardan kórsetilim uıymdastyrylyp, Qazaqstan halqy Assambleıasynyń qatysýymen mádenı kontsert ótti. Aıta keteıik, «Eýrazııa júregine saıahat» halyqaralyq ekspedıtsııasy Máskeý qalasynan bastalǵan. Eki aı ishinde qatysýshylar 8 myń shaqyrymnan asa jol júrip, Reseı, Qazaqstan, Qyrǵyzstan, Ózbekstan jáne Tájikstan elderindegi 30 qalaǵa barady.

Qazaqstan aýmaǵyndaǵy marshrýt eldiń ońtústigi men batysyndaǵy negizgi mádenı jáne týrıstik baǵyttardy qamtıdy. Olardyń qatarynda Aral, Baıqońyr, Qyzylorda, Túrkistan, Shymkent, Taraz jáne Almaty qalalary bar.