«Eýrazııa» júrdek temir joly eýrazııalyq ıntegratsııanyń sımvolyna aınalar edi - Toqaev

NUR-SULTAN. QazAqparat - «Eýrazııa» júrdek temir jolynyń jobasy eýrazııalyq ıntegratsııanyń sımvolyna aınalar edi. Bul týraly búgin elordada ótken Joǵary Eýrazııa ekonomıkalyq keńesiniń keńeıtilgen quramdaǵy otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Ótken jyldyń mamyrynda Sochıde ótken Joǵary Eýrazııalyq ekonomıkalyq keńes otyrysynda Qazaqstannyń Tuńǵysh Prezıdenti Nursultan Ábishuly Nazarbaev ınfraqurylymdyq mega joba - «Eýrazııa» júrdek temir jolynyń qurylysyn júzege asyrýdy usynǵan bolatyn. Bul joba eýrazııalyq ıntegratsııanyń sımvolyna aınalyp, elderimizdiń ekonomıkasyna qosymsha serpin berip, úlken Eýrazııany myǵym baılanystyra túser edi», - dedi Qasym-Jomart Toqaev.

Memleket basshysy Qazaqstannyń «Batys Eýropa - Batys Qytaı» kólik dáliziniń ózine tıesili bóligin aıaqtap, halyqaralyq kólik júıesine sátti ıntegratsııalanǵanyn aıtty.

«Bul jobanyń Reseı aýmaǵynda josparlanǵan jumystarynyń aıaqtalýy búkil dáliz boıynda júk tasymalyn aıtarlyqtaı ulǵaıtýǵa múmkindik beredi. Nátıjesinde memleketterimiz Shyǵys-Batys-Shyǵys tranzıti úshin barynsha básekege qabiletti ári tartymdy bola túsedi», - dedi Memleket basshysy.

QR Prezıdenti qazirgi ýaqytta EAEO-ǵa múshe memleketter ulttyq tsıfrlyq kún tártibin júzege asyryp jatqanyn aıtty.

«Bul - obektıvti qajettilik. Integratsııalyq birlestik retinde EAEO-nyń tsıfrlyq kún tárbin júzege asyrýǵa kirisýimiz - qýantarlyq jaıt. Bizdiń tsıfrlandyrýǵa tańdap alǵan jolymyz shynaıy seziletindeı ekonomıkalyq tıimdilikti qamtamasyz etýi tıis. Tsıfrlyq kúntártip aıasyndaǵy bastamalardyń birlestikke múshe barlyq memleketterdiń múdesin birdeı deńgeıde eskerýi túbegeıli mańyzdy. Bul bastamalar ózge elder úshin de tsıfrlyq kedergilerdi týǵyzýyna jol bermeý kerek», - dedi Qasym-Jomart Toqaev.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, Belarýs Respýblıkasynyń Prezıdenti Aleksandr Lýkashenko, Reseı Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonmen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.