Eýrazııa ýnıversıtetinde Májilis janyndaǵy Qoǵamdyq Palata músheleri «Dinı qyzmet jáne dinı birlestikter týraly» zań jobasyn talqyǵa salady
ASTANA. 13 qyrkúıek. QazAqparat - Sársenbi, 14 qyrkúıek kúni Astanadaǵy L.N.Gýmılev atyndaǵy Eýrazııa ýnıversıtetiniń bas ǵımaratynda QR Parlamenti Májilisiniń janyndaǵy Qoǵamdyq Palatanyń otyrysy ótedi.
Basqosýda «Dinı qyzmet jáne dinı birlestikter týraly» zań jobasy talqyǵa salynady.
Atalǵan zań jobasy boıynsha QR Din isteri agenttiginiń tóraǵasy Lama Sharıf Qaırat Qaıyrbekuly baıandama jasaıdy dep kútilýde.
Sondaı-aq Májilis janyndaǵy Qoǵamdyq Palatanyń músheleri Kamal Burhanov, Altynshash Jaǵanova, Orazaly Sábden jáne Dosmahanbet Kóshimniń kún tártibindegi másele tóńireginde sóz sóıleıtini qarastyrylǵan.
Sonymen qatar otyrysta «Dinı qyzmet jáne dinı birlestikter týraly»zań jobasy boıynsha qurylǵan jumys tobynyń jetekshisi, Májilistiń Zańnama jáne sot-quqyqtyq reforma komıtetiniń múshesi Ramazan Sárpekovtiń sóz sóıleıtini josparlanýda.
Otyrysqa qatysýshylar pikir almasqan soń, «Dinı qyzmet jáne dinı birlestikter týraly»zań jobasy boıynsha Qoǵamdyq Palatanyń qorytyndysy qabyldanbaq.
Bul keńes Májilis Tóraǵasynyń orynbasary, Qoǵamdyq Palatanyń tóraǵasy Vladımır Bobrovtyń jetekshilik etýimen ótedi.
Aıta ketý kerek, 8 qyrkúıek kúni Májiliste «Dinı qyzmet jáne dinı birlestikter týraly» zań jobasynyń tanystyrylymy bolyp ótti. Sonymen qatar «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy da tanystyryldy.
Atalǵan zań jobasy qoǵamdyq jáne dinı múddelerdiń tepe-teńdigin saqtaýǵa baǵyttalǵan. Dinı senim bostandyǵy salasyndaǵy memlekettik saıasattyń úsh negizgi qaǵıdattaryn aıryqsha bólip kórsetý kerek, olar - beıtaraptyq, toleranttylyq jáne teńdik. Bul rette eń basty másele memlekettiń dinı birlestikterdiń ishki isterine aralaspaý jónindegi beıtaraptyǵy bolyp tabylady. Toleranttylyq qaǵıdaty dinı senimderge degen qurmetti bildiredi. Teńdik qaǵıdaty barlyq dinı birlestikterdiń jáne ártúrli dinı senim ókilderiniń zań aldyndaǵy teńdigin qamtamasyz etedi.
Otyrystyń kún tártibine sáıkes qaralatyn ekinshi másele bar. Ol - 2011 jyldyń qyrkúıegi men 2012 jyldyń maýsym aılary aralyǵyn qamtıtyn QR Parlamenti Májilisiniń janyndaǵy Qoǵamdyq Palatanyń besinshi sessııaǵa arnalǵan jospary.
