Eýrazııa ýnıversıteti 3 jańa mamandyq boıynsha magıstrlerdi daıyndaýǵa kiristi
ASTANA. QazAqparat - Astanadaǵy L.N.Gýmılev atyndaǵy Eýrazııa Ulttyq ýnıversıteti ındýstrıaldyq-ınnovatsııalyq damý memlekettik baǵdarlamasy aıasynda bıyl 3 jańa «Bıotehnologııa», «Radıotehnıka, elektronıka jáne telekommýnıkatsııa», «Jylý energetıkasy» mamandyqtary boıynsha magıstrlerdi daıyndaýǵa kiristi.
Buǵan deıin joǵarǵy oqý orny «Qurylys materıaldary, buıymdar men konstrýktsııalary óndirisi», «Ǵaryshtyq tehnıka jáne tehnologııalar» mamandyqtary boıynsha maman daıyndaýdy qolǵa alǵan bolatyn. Bul týraly búgin el jurtshylyǵy, qoǵam jáne BAQ ókilderi, ýnıversıtet ujymy men stýdentteri aldynda esep bergen L.N.Gýmılev atyndaǵy EUÝ rektory Erlan Sydyqov málim etti.
Qazir osy jańa mamandyqtardy sapaly daıyndaýǵa múmkindik beretin jalpy somasy 449 104 myń teńge bolatyn «Qurylys materıaldary men buıymdary zerthanasy», «Shaǵyn ǵaryshtyq apparattar zerthanasy» quryldy. Olar biregeı qurylǵylarmen jabdyqtalǵan. Muny fızıka, nanotehnologııa, fızıkalyq jáne saraptamalyq hımııa, bıotehnologııa sııaqty pánaralyq salalarda qoldanýǵa bolady. Osy jyldyń sońyna deıin taǵy eki zerthana ashý josparlanyp otyr. Bul mamandyqtarda 579 magıstrant bilim alady. Olar álemdik ýnıversıtetterdiń standarttaryna sáıkes tájirıbege baǵyttalǵan bilim baǵdarlamalary negizinde oqıdy. Bilim baǵdarlamalaryn iske asyrýǵa Ońtústik Koreıa, Túrkııa, Qytaı, Polsha, Germanııa seriktes joǵary oqý oryndary qatysady.
