Eýrazııa Ulttyq ýnıversıtetiniń stýdentteri Memlekettik bilim berýdiń jınaqtaý júıesine qatysty máselelerdi talqylady
ASTANA. 3 qarasha. QazAqparat /Aıdar Ospanalıev/ - Búgin «Nur Otan» partııasynyń jastar qanaty «Jas Otan» uıymy L.Gýmılev atyndaǵy Eýrazııa Ulttyq ýnıversıtetinde Qazaqstan Respýblıkasyndaǵy Memlekettik bilim berýdiń jınaqtaý júıesine qatysty dóńgelek ústel otyrysyn uıymdastyrdy.
«Nur Otan» partııasynyń «Jas Otan» jastar qanatynyń Atqarýshy hatshysy Nurlan Óteshovtyń aıtýynsha, bilim uzaq merzimge salynǵan ınvestıtsııa. Sol sebepti bilim berýdiń jınaqtaý júıesi qoǵam aldynda turǵan ózekti máselelerdiń biri. «Búgingi tańda elimizdegi 2011-2020 jyldarǵa arnalǵan Memlekettik bilim berýdi damytý baǵdarlamasyn júzege asyrý aıasynda kóptegen múmkindikter jasalyp, aqyly túrde joǵary jáne kásiptik bilim alý múmkindikteri keńeıýde. Memlekettik bilim berýdiń jınaqtaý júıesi de osy baǵyttaǵy ıgilikterdiń biri. Qazir bul másele qalyń kópshilik arasynda keńinen talqylanýda. Bul rette árıne talqylanyp otyrǵan máselege qatysty jastardyń pikirlerin bilý de mańyzdy»,-deıdi Atqarýshy hatshy.
Onyń aıtýynsha, bul jan-jaqty kelisip baryp qolǵa alynýy qajet kúrdeli másele. Sondyqtan da «Jas Otan» uıymy oǵan qatysty kóptegen otyrystar uıymdastyrǵan. Sondaı-aq elimizde ekinshi deńgeıli bank ókilderi men ekonomıka jáne zań salasynyń sarapshylary, qarjy ortalyqtarynyń ókilderiniń qatysýymen arnaıy jumys toby qurylǵan. «Ol top osy ýaqytqa deıin eki májilis ótkizdi. Nátıjesinde memlekettik bilim berýdiń jınaqtaý júıesiniń jobasy boıynsha tıisti usynystar jınaqtaldy. Biz búgingi májilis barysynda da osyndaı usynystar men pikirler aıtylyp, qyzyqty pikirtalas bolady degen oıdamyn. Óıtkeni bul otyrys bizdiń bir aılyq jumysymyzdy qorytyndylaýy tıis»,-dedi N.Óteshov.
