Eýrazııa ulttyq ýnıversıtetiniń 185 túlegi magıstr atandy
ASTANA. QazAqparat - Búgin Eýrazııa ulttyq ýnıversıtetiniń 185 túlegi magıstr atandy. Olar Indýstrıaldy ıınnovatsııalyq damý memlekettik baǵdarlamasy aıasynda bilim alǵan, dep habarlaıdy 24.kz.
Túlekterdiń 112-si qurylys materıaldary, ónimderi jáne qurylymdary, al 73-i ǵaryshtyq tehnıka men tehnologııa mamandyǵy boıynsha 1 jarym jyl boıy bilimderin shyńdady. Sondaı-aq, oqý ordasynda baǵdarlamaǵa sáıkes 4 zerthana ashylǵan. Zamanaýı laboratorııalardyń arqasynda magıstranttar tek teorııany jetik bilip qana qoımaı, alǵan bilimin tájirıbe júzinde paıdalanýdy meńgerdi. Endi qolyna dıplom alǵan jas mamandar jumysqa belsene kirisip, elimizdiń ındýstrıaldy damýyna ózindik úlesin qospaq.
«Elimizdiń damýyna óz úlesimdi jerdi qashyqtyqtan zondtaý baǵyty boıynsha qospaqshymyn. Sebebi olar kópten zerttelmeı jatyr. Soǵan «Qazaqstan ǵarysh saparynyń» sýretteri arqyly jáne de ózimizdiń qorǵanys salasyndaǵy Tótenshe jaǵdaılar komıteti ókilderiniń kómegi arqyly bizge tónetin qaýipterdiń aldyn alý boıynsha atqarylatyn jumystarǵa úlesimdi qosqym keledi»,-deıdi ǵaryshtyq tehnıka men tehnologııa magıstri Aıgúl Ibrasheva.
