Eýrazııa ulttyq ýnıversıtetinde «tımýrshylar» toptary qurylady
Bul týraly búgin Lev Gýmılev atyndaǵy Eýrazııa ulttyq ýnıversıtetinde «Uly Otan soǵysynyń uly shaıqastary» atty avtorlyq eńbektiń tanystyrylymy kezinde Áleýmettik ǵylymdar fakýltetiniń dekany, professor Zııabek Qybyldınov málim etti, dep habarlaıdy QazAqparat.
Onyń sózine qaraǵanda, búginnen bastap ýnıversıtet janyndaǵy Ardagerler keńesine múshe azamattar fakýltettiń qurmetti oqytýshylary qataryna qabyldanbaq. «Osy kúnnen bastap bizdiń ardagerlerimiz jastarǵa Uly Otan soǵysynan ózderiniń estelikterin aıtyp, sol zulmat maıdannyń tarıhı taǵylymyn búgingi urpaqqa jetkizedi. Osynyń negizinde biz arnaıy kitapty shyǵarýdy qolǵa alamyz», - deıdi Z.Qybyldınov. Sondaı-aq fakýltet dekany atap kórsetkendeı, fakýltet janynan arnaıy toptar qurylyp, ardagerler qaýymyna kómek kórsetetin bolady. «Biz burynǵy «tımýrshylar» sııaqty bizdiń qurmetti ardagerlerimizge qolushyn beretin bolamyz», - deıdi ol.
