Eýrazııa ulttyq ýnıversıtetinde Naýryz meıramy toılanyp jatyr
ASTANA. 26 naýryz. QazAqparat/Aınur Kenebaeva/ - Búgin Eýrazııa ulttyq ýnıversıtetinde Naýryz meıramy saltanatty túrde atap ótilýde.
Bıylǵy Naýryzdy merekeleý sharasy óziniń aýqymdylyǵymen erekshelenip otyr. Kóktemniń alǵashqy shýaǵymen jarysa keletin Ulystyń Uly kúnine arnalǵan arnaıy baǵdarlamany tamashalaýǵa 800- den astam adam jıylyp, dala dýmany ýnıversıtet qabyrǵalarynda barlyq sán-saltanatymen toılanyp jatyr.
Dala dástúrin jurtshylyq nazaryna pash etken merekelik sharaǵa belgili depýtattar men Saýd Arabııasy, Mysyr, Grýzııa, Palestına, Ýkraına eliniń, sondaı-aq basqa da memleketterdiń tótenshe jáne ókiletti elshileri qadirli qonaq retinde shaqyrylyp, kóshpeli órkenıettiń mádenı bolmys-bitimimen, tarıhı tynys-tirshiligimen tereńirek tanysýda.
Merekelik dýman aıasynda sýret kórmesi uıymdastyrylyp, tól mádenıetimiz ben salt-dástúrimizdi nasıhattaý maqsatynda sahnalyq qoıylymdar kórsetilip, fakýltetaralyq saıystar shynaıy qazaqy úlgide ótkizilip jatyr.
«Áz-Naýryzdy qazaq halqy Ulystyń Uly kúni dep aıryqsha ulyqtap, kóktemdi jańarý kezeńine balaǵan. Naýryzdyń alǵashqy shýaǵymen birge elge qut, bereke, yrys qonady dep sengen. Aqsaqaldar Ulys oń bolsyn, aq mol bolsyn dep aq batasyn bergen. Sondyqtan da bıylǵy Naýryz barshamyzǵa ymyra -birlik, yntymaq pen baq darytsyn», - dep quttyqtady jıylǵan qaýymdy L.N. Gýmılev atyndaǵy Eýrazııa ulttyq ýnıversıtetiniń rektory Baqytjan Ábdiraıymov.
