Eýrazııa ulttyq ýnıversıtetinde qyrǵyz tili men mádenıeti ortalyǵy ashyldy
Saltanatty sharada Qyrǵyz Respýblıkasynyń Qazaqstan Respýblıkasyndaǵy Tótenshe jáne Ókiletti elshisi Dastan Dıýshekeev Qyrǵyzstan men Qazaqstan arasynda bilim berý salasynda kelisim bar ekenin jetkizdi.
«Ortalyqtyń ashylýy bizdiń azamattarymyzdyń, osynda oqıtyn stýdentter úshin sapaly bilim alýǵa úlken áleýetke jol ashady», - dedi dıplomat.
Qyrǵyz tili men mádenıeti ortalyǵy EUÝ-dyń oqý-zerthanalyq ǵımaratynda ashyldy. Onda eki eldiń zııaly qaýym ókilderiniń eńbekteri nazarǵa usynylǵan. Eýrazııa ulttyq ýnıversıteti men Osh memlekettik ýnıversıteti birlese bilim berý baǵdarlamalaryn júzege asyryp keledi, sonymen birge ortalyqta til kýrstary ótkizilmek.
«Bul – bizdiń negizgi seriktesimiz Osh memlekettik ýnıversıtetimen ǵylymı-akademııalyq yntymaqtastyq aıasyndaǵy baılanysty keńeıtýdegi mańyzdy qadam. 2019 jyldan bastap EUÝ-da Qyrǵyzstannyń joǵary oqý oryndarynan 200-den astam sheteldik bilim alýshylar ártúrli bilim berý baǵdarlamalary boıynsha oqydy. Ortalyqtyń ashylýy baýyrlas elderimiz arasyndaǵy yntymaqtastyqty odan ári nyǵaıtýǵa erekshe úles qosatynyna senimdimiz», - dedi L. Gýmılev atyndaǵy EUÝ rektory Erlan Sydyqov.
Ótken jyly Qyrǵyzstanda EUÝ fılıaly ashylǵan. Búgingi tańda onda 30-ǵa jýyq qyrǵyz stýdenti bilim alady. Olar qazaq tili, aýdarma isi men ádebıet mamandyǵy boıynsha oqıdy.
«Bizdiń ýnıversıtetter arasyndaǵy yntymaqtastyq Qyrǵyzstan men Qazaqstan arasyndaǵy dıplomatııalyq qatynastardyń damýyna áser etedi. Óıtkeni, bilim – memleketter arasyndaǵy kópir. Biz úshin EUÝ – Qazaqstandaǵy úzdik ýnıversıtet. Búgingi mańyzdy is-shara EUÝ men OshMÝ arasyndaǵy dostyqqa serpin beredi dep senemin», - dep atap ótti OshMÝ rektory Qudaıberdı Qojobekov.
Atap ótken jón, EUÝ Qyrǵyz Respýblıkasynyń 16 joǵary oqý ornymen akademııalyq utqyrlyq, qos dıplomdy bilim berý, oqytýshylyq tájirıbe almasý sheńberinde yntymaqtastyq ornatqan.
