Eýrazııa ulttyq ýnıversıtetinde kókparshylar daıarlaý qolǵa alynbaq
ASTANA. QazAqparat - QR Ulttyq sport túrleri qaýymdastyǵynyń prezıdenti B.Tileýhan Eýrazııa ulttyq ýnıversıtetiniń rektory E.Sydyqovpen kezdesti. Oǵan memlekettik jattyqtyrýshy R.Sáttibaev, Asylbek Izbaıyrov bastaǵan mamandar men EUÝ-niń dene shynyqtyrý kafedrasynyń oqytýshylyq-professorlyq quramy qatysty.
Otyrysta qaralǵan basty másele - Eýrazııa ulttyq ýnıversıtetiniń qabyrǵasynan Ulttyq sport túrleri bólimshesin ashyp, bolashaq mamandar daıyndaý. Atalǵan bólimshe Ulttyq sporttyń barlyq túrlerin damytýǵa atsalysatyn bolady. Aıtalyq, búgingi tańda umytylyp bara jatqan qolóner sheberlerin daıyndaý, toǵyzqumalaq sportshylaryn tárbıeleý, qusbegilikti dáripteý, qazaqy qumaı tazy baptaýdyń qyry men syryna úıretý negizgi nazarǵa alynady.
Sonymen qatar kókparshylar daıyndaý, túıepalýan dástúrin dúnıege pash etý, ulttyq sporttyń ózge de túrlerinen oqýshylar tárbıelep, bolashaq mamandaryn jetildirip shyǵarý kózdelmek, dep habarlaıdy QR Ulttyq sport túrleri qaýymdastyǵynan. «Búgingi tańda Ulttyq sporttyń qyr-syryn biletin mamandardyń derligi jasy egde tartqandar. Osy turǵydan kelgende, ózekti másele - jas mamandar, tóreshiler daıyndaý bolyp tabylady. Onyń ústine, qazirgi tańda qarapaıym aýyl jurtynyń sanasynda joǵary oqý orny baı-baǵlannyń balasyna buıyrǵan degen túsinik bar. Bizdiń maqsatymyz - aýylda ósken, at qulaǵynda oınap, kókpar tartyp, asaý úıretken qazaqtyń qaradomalaq balasyn oqýǵa tartý, maman retinde tárbıeleý. Sonymen birge olardyń aqysyz oqýyna jaǵdaı jasaý, memleketten arnaıy grant taǵaıyndaýǵa muryndyq bolý», - deıdi memlekettik jattyqtyrýshy R.Sáttibaev.
