Eýrazııa ulttyq ýnıversıtetinde «Qazaq» gazetiniń 100 jyldyǵyna arnalǵan konferentsııa ótedi

Bul sharany osy ulttyq ýnıversıtettiń jýrnalıstıka jáne saıasattaný fakýlteti uıymdastyryp otyr.

Konferentsııa jumysy jýrnalıstıka tarıhy men teorııasy, saıasattaný, pedagogıka jáne psıhologııa, tarıh, etnografııa, fılosofııa, ádebıettaný, til bilimi syndy baǵyttarda júrgiziledi.

Sharanyń basty maqsaty - «Qazaq» gazetiniń alǵashqy sanynyń shyqqanyna bir ǵasyr tolǵanyn, Alash jurty úshin qandaı qyzmet atqarǵanyn jetkizý. Alash qozǵalysynyń saıası ustanymdaryn jarııalap turǵan basylymnyń aǵartýshylyq ról ǵana emes, alǵash jaryq kórgen kúninen bastap qazaq dalasynyń qoǵamdyq-saıası jáne mádenı ómirin jaqsartýǵa qyzmet etkenin pash etý. Sondaı-aq, Elbasy N.Nazarbaevtyń «Qazaqstan-2050» strategııasy: qalyptasqan memlekettiń jańa saıası baǵyty» atty Qazaqstan halqyna Joldaýynda kóterilgen máselelerge basymdyq berip, onyń qazirgi qoǵam úshin mańyzdylyǵyn kórsetý.Sol arqyly qazaq jýrnalıstıkasynyń ótken tarıhy men búginin salystyryp, keler bolashaǵyn saralaý. Jaqynda QR Memlekettik hatshysy Marat Muhanbetqazyuly atap ótkendeı, qazaq jýrnalıstıkasynyń tarıhı tájirıbesin taldaı otyryp, sapasyn bıik deńgeıge kóterip, básekege qabilettiligin arttyrý - búgingi kúnniń basty talaby.

Sharaǵa QR Mádenıet jáne aqparat mınıstrligi, QR Bilim jáne ǵylym mınıstrligi ókilderi men Q.Sultanov bastaǵan bir top depýtattyq korpýs ókilderi A.Smaıyl, O.Asanǵazyqyzy, BAQ basshylary men jetekshi jýrnalıster qatysady dep kútilýde. Jıynda alashtyń mańdaıaldy ǵalymdary M.Qoıgeldıev, H.Ábjanov, D.Qamzabekuly, Q.Saq, B.Jaqyp, T.Jurtbaı, A.Qyryqbaı, Q.Atabaev, Ó.Ábdimanuly, A.Shárip, B.Omarov sekildi professorlar baıandama jasaıdy.

Ǵylymı-teorııalyq konferentsııanyń ekinshi jartysy tústen keıin sektsııalyq jumystarda jalǵasyn tabady.