Eýrazııa ulttyq ýnıversıtetinde ǵalym A.Hadjıevtyń dárishanasy ashyldy
ASTANA. Mamyrdyń 21-i. QazAqparat /Arman Asqarov/ - Búgin Lev Gýmılev atyndaǵy Eýrazııa ulttyq ýnıversıtetinde belgili ǵalym, professor Anvar Hadjıev atyndaǵy dárishana ashyldy,
dep habarlaıdy QazAqparat.
A.Hadjıev - uzaq jyldar boıy agraralyq, azamattyq jáne jer quqyqtary boıynsha tolymdy eńbekter jazyp, elimizdegi zań bilimin jetildirýge úlken úles qosqan azamat. Onyń bastamasymen 100-ge jýyq zertteý eńbekteri jaryqqa shyqty. A.Hadjıevtyń qatysýymen Jer jáne Ekologııa kodeksteri ázirlendi. Ómirdiń sońǵy jyldary ǵalym A.Hadjıev Eýrazııa ulttyq ýnıversıtetiniń Zań fakýltetinde eńbek etti, osy joǵary oqý ornynda Azamattyq-quqyqtyq kafedrasynyń negizin qalady. Sondaı-aq ol Memlekettik-quqyqtyq zertteýler, zań jobalaryn daıyndaý jáne saraptaý ınstıtýtynyń ashylýyna muryndyq boldy.
«Stýdenttik kezden bastap Anvar Hadjıev óziniń belsendi ómirlik ustanymymen kózge tústi. Kez kelgen adammen til tabysa alatyn, óz kózqarasyn júıeli túrde jetkize bilgen, qarapaıym minezi bar ol bárimizge jaqyn boldy», - deıdi A.Hadjıevtyń dosy Almas Qudaıbergenov.
Búgin Anvar Hadjıev atyndaǵy dárishananyń ashylý rásimine ǵalymnyń jubaıy men uly, týǵan-týysqandary men aýyldastary qatysty.
