Eýrazııa ulttyq ýnıversıtetinde dástúrli «Aqseleý Seıdimbek oqýlary» ótedi

Ýnıversıtet baspasóz qyzmetiniń habarlaýynsha, belgili etnograf-ǵalym, pýblıtsıst, fılologııa ǵylymdarynyń doktory, professor, QR Memlekettik syılyǵynyń ıegeri Aqseleý Slanuly Seıdimbektiń týǵan kúnine oraılastyrylǵan eske alý jıynynda onyń qalamdas dostary, áriptesteri, óner men ǵylymdaǵy shákirtteri bas qosady. Olardyń qatarynda belgili ǵalym Qoıshyǵara Salǵarauly, ekonomıka ǵylymdarynyń doktory, professor Myrzageldi Kemel, Qazaqstannyń halyq ártisi Qaırat Baıbosynovtar bar.

Esterińizge sala keteıik, ótken jyly L.Gýmılev atyndaǵy Eýrazııa ulttyq ýnıversıtetinde A. Seıdimbek atyndaǵy Ǵylym zaly ashylǵan bolatyn. Onda ǵalymnyń kitaptary men ǵylymı-shyǵarmashylyq jolynan syr shertetin fotosýretteri, ózi tutynǵan qundy zattary qoıylǵan. Ýnıversıtet stýdentteriniń kez kelgen ýaqytta ǵalymnyń baı kitaphanasynan sýsyndap, onyń ǵylymı-zertteý eńbekterimen tanysýyna múmkindik jasalǵan.

QazAqparat anyqtamasy: Seıdimbek Aqseleý Slanuly 1942 jyly 22 jeltoqsanda Qaraǵandy oblysy Jańarqa aýdanynda dúnıege kelgen. 1963-1968 jyldary ál-Farabı atyndaǵy QazUÝ-dyń jýrnalıstıka fakýltetinde oqyǵan. 1968-1975 jyldary «Lenınshil jas» (qazirgi «Jas Alash») gazetinde ádebı qyzmetker, menshikti tilshi, 1975-1976 jyldary «Ortalyq Qazaqstan» gazetiniń jaýapty hatshysy, 1976-1983 jyldary «Sotsıalıstik Qazaqstan» (qazirgi «Egemen Qazaqstan») gazetinde Ádebıet jáne óner bóliminiń meńgerýshisi, 1983-1987 jyldary «Bilim jáne eńbek» (qazirgi «Zerde») jýrnalynyń bas redaktory bolyp qyzmet atqardy.
1987-1997 jyldary QR UǴA-nyń M.Áýezov atyndaǵy Ádebıet jáne óner ınstıtýtynda bólim meńgerýshisi, 1997 jyly Y. Altynsarın atyndaǵy Bilim problemalary ınstıtýtynyń dırektory, 1998 jyly Y.Altynsarın atyndaǵy Qazaq bilim akademııasynyń prezıdenti bolyp taǵaıyndaldy. 1999 jyly QR Prezıdenttik Mádenı ortalyǵy dırektorynyń ǵylym jónindegi orynbasary boldy. 2000 jyldan L.Gýmılev atyndaǵy Eýrazııa ulttyq ýnıversıtetinde jýrnalıst mamandaryn daıarlaýmen aınalysty.

Aqseleý Seıdimbek 8 monografııanyń, birneshe ǵylymı eńbek pen oqý quraldardyń jáne 400-den astam maqalanyń avtory.