Eýrazııa ulttyq ýnıversıtetinde ákimshilik sottyń kóshpeli otyrysy ótti
ASTANA. Qarashanyń 12-si. QazAqparat /Marlan Jıembaı/ - Búgin Eýrazııa ulttyq ýnıversıtetinde jastar arasyndaǵy quqyq buzýshylyq, nashaqorlyq jáne maskúnemdiktiń aldyn alý maqsatynda prokýratýra ókilderi men stýdentterdiń qatysýymen ákimshilik sottyń kóshpeli otyrysy ótti,
dep habarlaıdy QazAqparat.
Astana qalalyq ІІD til saıasaty jáne aqparat bóliminiń bastyǵy Nurdildá Orazdyń aıtýynsha, qarashanyń 4-inde polıtsııa bólimshesiniń ýchaskelik ınspektory men atalǵan bilim ordasynyń jedel jastar otrıadynyń músheleri 1989 jyly týylǵan azamatty ustaǵan. Tekserý barysynda odan esirtki zaty - gashısh tabylǵan.
Osy jaıtqa oraı búgin ótken sottyq talqylaý barysynda, ustalǵan azamattyń buǵan deıin de esirtki zatyn paıdalanǵany anyqtaldy.
«Ákimshilik sottyń sheshimimen onyń kinási tolyǵymen moıyndalyp, QR Ákimshilik quqyq buzýshylyq kodeksiniń 320-shy babymen jaýapqa tartyldy jáne 4 AEK (aılyq eseptik kórsetkish) kóleminde aıyppul tóleıtin boldy», deıdi N.Oraz.
Sot otyrysynan keıin jedel jastar otrıadynyń músheleri aqshalaı marapattalyp, olardyń qataryna qosylǵan jastarǵa arnaıy kýálik tabystaldy.
