Eýrazııa ulttyq ýnıversıtetin damytý baǵdarlamasy Úkimetke usynylady
ASTANA. QazAqparat - L.Gýmılev atyndaǵy Eýrazııa ulttyq ýnıversıtetin ári qaraı damytý baǵdarlamasy Qazaqstan Respýblıkasy Úkimetiniń nazaryna usynylady. Bul týraly búgin halyq aldyndaǵy eseptik kezdesýin ótkizgen atalǵan ýnıversıtettiń rektory Erlan Sydyqov aıtty, dep habarlaıdy QazAqparat.
Onyń aıtýynsha, Eýrazııa ulttyq ýnıversıtetiniń strategııasynda ulttyq zertteý ýnıversıteti mártebesin alýǵa umtylatyndyǵy aıtylǵan.
«Zertteý ýnıversıteti - biz úshin de, sizder úshin de zor múmkindik. Endi «oqytý - zertteýler júrgizý - zertteý nátıjelerin engizý - ınnovatsııalyq kásiporyndar qurý» tizbeginen turatyn tsıkl júzege asýy tıis. Bul naqty qoldaýdy, tereń túsinistikti qajet etedi. Jańa patenttik-lıtsenzııalyq saıasatty jasaý - tehnologııalardy kommertsııalyq maqsatta paıdalaný kezindegi qarym-qatynasty retteýdiń quraly. Ulttyq zertteý ýnıversıteti mártebesi kásibı kadrlarǵa talapty kúsheıtedi. Zııatkerlik ǵylym-bilim salasynda sheteldik professýranyń qatysýy arqyly jańa kadr saıasatyn júzege asyrý eldiń ınnovatsııalyq damý faktoryn nyǵaıtady», - dedi ol.
Osy rette ýnıversıtet basshysy bilim ordasy aıasynda marketıng bólimi, HR -saıasat, alystan bilim berý ortalyǵy, ádistemelik kabınet, kásibı beıimdeý jáne testileý ortalyǵy jáne basqa da qurylymdar bolatyndyǵyn jáne olar basqarý jáne uıymdyq qurylymdy yqshamdaýǵa múmkindik beretindigin basa aıtty.
«Kólbeý basqarý baılanysy jetildiredi. Bul rette árkimniń jeke jaýapkershiligi kásibı biliktiliktiń ólshemine aınalady. «Rýhanı jańǵyrý» baǵdarlamasynyń ıdeologııalyq ári praktıkalyq bólikteri - ýnıversıtettiń bilim berý saıasatyndaǵy sheshýshi baǵdar. Ǵylym, ınnovatsııa, bilim jáne áleýmettik salalardaǵy josparlardy damyǵan ınfraqurylymmen ǵana júzege asyra alamyz. Stýdentterdiń áleýmettik jaǵdaıyn jasaý, olardyń oqýy men turmysyna jaıly jaǵdaı týǵyzý - mańyzdy mindetimiz. Osyǵan deıin de júrgizilip kelgen «Stýdentter úılerin», jańa oqý ǵımarattaryn salý, paıdalanýǵa berý, ınfraqurylymdy damytý jumystarymyzdy odan ári jalǵastyramyz», - dedi ol.
Sonymen qatar Erlan Sydyqov Ulttyq bıotehnologııa ortalyǵyn, EKSPO-nyń qosalqy ınfraqurylymdyq nysandaryn ýnıversıtet balansyna alý boıynsha jumystar júrgizý, Ǵylymı kitaphanany jańa basymdyqtar negizinde jańǵyrtý, aqparattyq-kommýnıkatıvtik tehnologııalardy engizý ýnıversıtettiń birinshi kezektegi mindetteri bolatyndyǵyn basa aıtty.
«Eýrazııa ulttyq ýnıversıtetin ári qaraı damytý baǵdarlamasy Qazaqstan Respýblıkasy Úkimetiniń nazaryna usyný úshin ázirlendi», - dedi Erlan Sydyqov.
