Eýrazııa Ulttyq ýnıversıteti stýdentiniń ólimine qatysty sot-medıtsınalyq saraptama taǵaıyndaldy - ІІM
ASTANA. Mamyrdyń 5-i. QazAqparat /Aıdar Ospanalıev/ - «L.N.Gýmılev atyndaǵy Eýrazııa Ulttyq ýnıversıtetiniń stýdenti Alına Tanaevanyń ólimine qatysty júrgizilgen tekserý jumystary mert bolǵan qyzdyń denesinde eshqandaı da zorlyq-zombylyq áreketteriniń izi joq ekendigin kórsetip otyr.
Soǵan qaramastan búgin atalmysh faktige baılanysty sot-medıtsınalyq saraptama taǵaıyndaldy. Saraptama jumystarynyń qorytyndysy boıynsha protsessýaldyq sheshim qabyldanady. Bul baǵyttaǵy jumystar boıynsha biz kópshilikti qosymsha habardar etetin bolamyz», deıdi Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov. Bul týraly ol búgin jýrnalıstermen bolǵan aptalyq brıfıngte málim etti.
Esterińizge sala keteıik, L.N.Gýmılev atyndaǵy Eýrazııa Ulttyq ýnıversıtetiniń stýdenti Alına Tanaeva sáýirdiń 22-i kúni ózi oqıtyn oqý ornynyń mańynda ósip turǵan aǵashqa asylyp qalǵan jerinen tabyldy. Uqypty ári sándi kıingen qyzdyń janynan qolhat tabylǵan. Onda stýdent qyz «Meniń ólimime birge oqıtyn kýrstastarym men meni túsinbeı bar kináni ózime japqan ustazdarym kináli» dep jazǵan jáne ózi kinálap otyrǵan kýrastastary men ustazdarynyń aty-jónderin kórsetken.
Aqparat quraldary taratqan málimetterge qaraǵanda, 19 jasar Alına Tanaeva Jambyl oblysynyń Baızaq aýdanynan kelgen. Ulttyq biryńǵaı testen 111 bal jınaǵan ol joǵary oqý ornyna grant arqyly túsken. Sondaı-aq sáýirdiń 20-sy kúni úıine telefon shalyp, ózin 10 qyzdyń jabylyp uryp-soǵyp, sómkesi men aqsha alatyn kártishkesin tartyp alǵandyǵyn aıtqan. Bolǵan jaıdan qanyqqan soń Astanaǵa qyzdyń aǵasy kelgen. Al aǵasyna stýdent qyz Madına atty qurbysymen bir jigitke bola ursysyp qalǵandyǵyn, al qurbysy kýrstas qyzdardyń barlyǵyn oǵan qarsy qoıǵandyǵyn aıtqan. Budan soń bir kýrsta oqıtyn qyzdardyń barlyǵy jınalyp, Alınany tizerlep otyryp, keshirim suratpaq bolǵan. Alına keshirim suraýdan bas tartqan soń ony qurbylarynyń barlyǵy soqqyǵa jyǵyp tepkilegen.
