Eýrazııa ulttyq ýnıversıteti álemniń 500 úzdik ýnıversıtetiniń qataryna endi - QS World University Rankings® reıtıngisi
ASTANA. Qyrkúıektiń 10-y. QazAqparat /Arman Asqarov/ - QS World University Rankings® reıtıng agenttiginiń bıylǵy qorytyndysy boıynsha, elimizdiń irgeli joǵary oqý orny - Lev Gýmılev atyndaǵy Eýrazııa ulttyq ýnıversıteti álemniń 500 jetekshi ýnıversıtetiniń qataryna qosyldy,
dep habarlaıdy QazAqparat.
Ótken jyly bul kórsetkish 600 ýnıversıtettiń aıasynda bolsa, bıyl Qazaqstannyń Eýrazııa ulttyq ýnıversıteti álemniń 17 myń joǵary oqý oryndarynyń ishinen 501-shi orynnan 451-shi orynǵa kóterildi. Ortalyq Eýropa jáne Qazaqstan boıynsha atalǵan úzdikter tobynda M.V.Lomonosov atyndaǵy Máskeý memlekettik ýnıversıteti, Ekonomıkanyń joǵary mektebi ýnıversıteti, Vengrııanyń Jeget ýnıversıteti jáne taǵy basqa birqatar oqý oryndary bar.
Álemniń úzdik ýnıversıtetteriniń QS World University Rankings® reıtıngisi joǵary oqý oryndaryn baǵalaý barysynda ýnıversıtettiń zertteý qyzmeti, jumys berýshilerdiń pikirleri, bilim berý úderisi men osy saladaǵy jańalyqtardy tıimdi paıdalana bilý deńgeıi eskeriledi. Sondaı-aq reıtıngti ázirleý kezinde ǵylym salasyndaǵy halyqaralyq zertteýlerge jáne álemniń eń iri ǵylymı maqalalar bazasy bolyp tabylatyn Skopýs boıynsha ýnıversıtet ǵalymdary jazǵan eńbekterge silteme jasaý ındeksine basa nazar aýdarylady.
Aıta keteıik, Qazaqstan Respýblıkasynyń Prezıdenti Nursultan Nazarbaev bıylǵy «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty el halqyna arnaǵan Joldaýynda otandyq bilim salasyn damytý qajettigine erekshe toqtalyp: «Joǵary bilim sapasy eń joǵary halyqaralyq talaptarǵa jaýap berýi tıis. Eldegi joǵary oqý oryndary álemniń jetekshi ýnıversıtetteriniń reıtıngisine enýge umtylýlary kerek», - dep atap ótken bolatyn.
