Eýrazııa ulttyq ýnıversıtetinde Lý Ban sheberhanasy ashylady
ASTANA. KAZINFORM – Lý Ban sheberhanasy Eýrazııa ulttyq ýnıversıtetinde ashylady. Bul týraly Ǵylym jáne joǵary bilim mınıstri Saıasat Nurbek málim etti.
«Súıinshi, jańalyq, Astanada Beıjiń Til jáne mádenıet ýnıversıtetiniń fılıaly ashylady. Bıyl alǵashqy 100 stýdent oqýyn bastaıdy. Osy oraıda QHR Bilim mınıstri Hýaı Tszınpen myrzaǵa alǵys aıtamyn, osy kisiniń tikeleı qatysýymen qolǵa alynyp otyr. Taǵy bir jańalyq elordadaǵy Eýrazııa ulttyq ýnıversıtetiniń qabyrǵasynda Lý Ban sheberhanasy ashylady. Búgin tústen keıin Hýaı Tszınpen myrza ashylatyn sheberhananyń ınfraqurylymymen tanysady. Lý Ban sheberhanasy óte keremet, eń sońǵy qoldanbaly formatta oqytady. Byltyr Óskemende ashylǵan, endi elordada ashylǵaly otyr. Taǵy da Qytaı basshylyǵyna alǵys aıtamyn, sebebi Qytaı úkimetiniń bir elde bir ǵana sheberhana ashý prıntsıpi bar, al Qazaqstan úshin osyndaı sheshim qabyldap otyr», - dedi Saıasat Nurbek elordada ótip jatqan «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda.
Eske sala ketsek, bıyl aqpanda Memleket basshysy Óskemendegi «Lý Ban sheberhanasynyń» jumysymen tanysqan edi.
Aıta keteıik, «Lý Ban sheberhanasy» «Avtomobılderdiń ınnovatsııalyq konstrýktsııasy» jáne «Avtomobılderdiń SMART tehnologııasy» sııaqty eki zerthanadan turady.
Ortalyqtyń bir ereksheligi – munda stýdentter praktıkalyq daǵdylardy meńgerip, avtomobıl júıelerine sımýlıatsııalyq synaq júrgize alady. Sondaı-aq ortalyqta elektromobılder men gıbrıdti kólikterge tehnıkalyq qyzmet kórsetý jáne dıagnostıka jasaý úshin jańa tehnologııalardy ıgerý isine aıryqsha mán beriledi.
Keshe Astana halyqaralyq ýnıversıtetiniń bazasynda Beıjiń Til jáne mádenıet ýnıversıtetiniń fılıaly ashylǵany týraly habarlaǵan edik.
