Elordalyq máslıhat mereıtoıǵa oń nátıjelermen jetti - Erlan Qanalımov
ASTANA. KAZINFORM – Astanada Qazaqstan Respýblıkasy máslıhattarynyń 30 jyldyǵyna arnalǵan «Myqty máslıhattar – memlekettik basqarý men ózin-ózi basqarýdyń negizgi ınstıtýty» atty ǵylymı-tájirıbelik konferentsııa ótti. Oǵan barlyq shaqyrylymdaǵy depýtattar qatysty.
«Máslıhat – jergilikti ózin-ózi basqarý salasynda mańyzdy rólge ıe. Ol halyq pen bılik arasyndaǵy altyn kópir. Qoǵamnyń sózin aıtyp, azamattardyń quqyqtary men múddelerin qorǵaıtyn senimdi saıası ınstıtýt. Bıyl el máslıhattarynyń qurylǵanyna mereıli 30 jyl. Astana qalasynyń máslıhaty elordamyzdyń órkendeýine zor úles qosyp keledi. Máslıhat depýtattary qala halqynyń turmys sapasyn jaqsartýǵa atsalysyp, el múddesi jolynda tyndyrymdy eńbek etýde. Qabyldanǵan árbir sheshimniń halyqtyń múddesi, eldiń bolashaǵy basty nazarda», - dep jazylǵan Astana qalasynyń ákimi Jeńis Qasymbektiń quttyqtaý hatynda.
Shara moderatory, L.N. Gýmılev atyndaǵy Eýrazııa ulttyq ýnıversıtetinde rektory Erlan Sydykov kún tártibinde máslıhattardyń óńirlerdiń turaqty damýyndaǵy jáne jergilikti basqarýdaǵy róli turǵanyn atap ótti.
«Búgin biz máslıhattardyń jergilikti basqarýdyń negizgi elementi retindegi mańyzdy rólin talqylaımyz. Kúshti máslıhattar – tek óńirlerdiń tiregi emes, eldiń turaqty damýynyń mańyzdy faktory. Bul zalda jergilikti basqarýdy nyǵaıtýǵa sheshimder usynýǵa daıyn túrli sala mamandary jınaldy. Bizdiń pikirtalastarymyz jergilikti bılik aldynda turǵan syn-qaterler men múmkindikterdi tereńirek túsinýge kómektesedi», - dep atap ótti E. Sydyqov.
Astana qalasy máslıhatynyń tóraǵasy Erlan Qanalımov halyq saılaıtyn jergilikti ókildi organ jumysynyń qorytyndylary týraly aıtyp berdi.
«El zańnamasyna sáıkes, búgingi máslıhat – Astana halqynyń erkin bildiretin jáne memlekettik múddelerdi eskerip, ony júzege asyrý úshin qajetti sharalardy anyqtap, olardyń oryndalýyn qadaǵalaıtyn ókildi organ. Elordalyq máslıhat mereıtoıǵa oń nátıjelermen jetti. Basty mindetimiz – elimizdiń bas qalasyndaǵy ómirdi jaıly ári qaýipsiz etý. Osy maqsatta barlyq memlekettik organdarmen belsendi yntymaqtastyq ornatyldy. Máslıhattar azamattardyń ótinishterin qabyldap, olarǵa jedel jaýap beredi. Bıylǵy jyl da elorda men búkil el turǵyndary úshin eń aldymen paıdaly istermen este qalady dep senemin», - dedi ol.
«Qazaqstan máslıhat depýtattary» RQQ tóraǵasy Tóleýbek Muqashev 30 jylda barlyq máslıhattar yqpaldy bılik organdaryna aınalǵanyn atap ótti.
«Onsyz óńirler men qalalardyń turaqty damýyn elestetý múmkin emes. Sizderdiń qyzmetterińiz Astananyń ár turǵynynyń amanatyn arqalap, qalany abattandyrýǵa qatysty sheshimder qabyldaýdan bastap, túrli áleýmettik, ekonomıkalyq, saıası salalarda mańyzǵa ıe. Jyl basyndaǵy sý tasqyny kezinde, odan keıingi qanshama syndarly shaqta máslıhattyń barlyq býyndary ózderin kórsete bildi. Jer-jerdegi áriptesterimiz halyq pen atqarýshy bılik arasynda kópir bolyp, ár alýan eldik jobalardyń júzege asýyna jol ashty», - dedi T. Muqashev.
Konferentsııada Astana qalasy máslıhatynyń I-VIII shaqyrylymnyń birqatar depýtatyna QR Parlamenti Senatynyń Qurmet gramotasy men Alǵys haty, Qazaqstan Respýblıkasy Mádenıet jáne aqparat mınıstrliginiń Qurmet gramotasy, «Eńbek ardageri», «Ekologııa salasynyń úzdigi», «Eńbek sińirgen energetık», «Nashaqorlyqpen jáne esirtki qylmysymen kúreske qosqan úlesi úshin» tósbelgileri, Eńbek jáne halyqty áleýmettik qorǵaý mınıstrliginiń, Sý resýrstary jáne ırrıgatsııa mınıstrliginiń Alǵys hattary tabystaldy.
Astana qalasy máslıhatynyń I-VIII shaqyrylym depýtattary vedomstvolyq nagradalarmen jáne «Qazaqstan máslıhattarynyń Qurmetti depýtaty» tósbelgisimen marapattaldy.
Konferentsııa aıaqtalǵan soń Máńgilik El dańǵylyndaǵy skverde «Astana qalasy máslıhatynyń 30 jyldyǵy» alleıasy ashylyp, kóshet otyrǵyzý rásimi ótti.
