"Eýrazııa" saqtandyrý kompanııasy osy naryqqa qatysýshylardy "qarjylyq patrıotızm" úlgisin kórsetýge shaqyrdy
ALMATY. 3 qarasha. QazAqparat /Erlik Erjanuly/ - "Eýrazııa" Saqtandyrý kompanııasy" AQ-nyń Basqarma tóraǵasy Borıs Omarovtyń pikirinshe, Qazaqstannyń qarjy sektoryn damytý úshin patrıottar kerek. Ol bul oıyn búgin Almatyda ótken baspasóz máslıhatynda aıtty.
"Qarjy patrıottary dep qandaı da bir qarjy ınstıtýttaryn qurǵan quryltaıshylar men aktsıonerlerdiń onyń jarǵylyq jáne menshiktik kapıtalyn turaqty túrde ulǵaıtyp otyrýyn aıtýǵa bolady. Al dıvıdent alýmen shektelip, qarjy ınstıtýty qıyndyqqa kezikken kezde onyń qasynan tabylmaǵandar "qarjy patrıottary" bola almaıdy", - deıdi B. Omarov.
Onyń aıtýynsha, Qazaqstannyń qarjy sektoryn damytýda retteýshiniń "qarjy patrıotızmimen" ushtastyra júrgizgen qatań sharalary negizgi yntalandyrýshy kúshke aınalmaq. Naryq damyǵanda ınvestorlardyń da qyzyǵýshylyǵy artady. Ósim báseńdese nemese toqtap qalsa jaǵdaı túbegeıli ózgerip, olar qarjattaryn áketýge tyrysady. Qazaqstanda qarjy patrıottarynyń úlgisi bar. Ázirge olardyń úlesi óte az.
