Eýrazııa ortalyǵynda tranzıttik-logıstıkalyq hab qalyptasty

ASTANA. QazAqparat - Qazaqstan aýmaǵy arqyly júkterdi kóliktiń barlyq túrlerimen tranzıtteýdiń jalpy kólemi 6 paıyzǵa ósip, 19,2 mln tonnany qurap otyr. Onyń ishinde Qytaı-Eýropa baǵytynda ósim 40 paıyzdy (171,2 myń kont.) jáne Eýropa-Qytaı baǵytynda 80 paıyzdy (139,6 myń kont.) kórsetken.

2018 jyldyń qorytyndysy boıynsha kóliktik qyzmetter kólemi 2017 jylmen salystyrǵanda 4,6 paıyzǵa ulǵaıǵan.

«Nurly jol» memlekettik baǵdarlamasy sheńberinde avtojol jobalaryn aýqymdy iske asyrý jalǵasyp keledi. Táýelsizdik jyldary shamamen 12 myń shaqyrym jol salynyp, qaıta jańǵyrtylǵan. 2018 jyly respýblıkalyq mańyzy bar joldyń 1,5 myń shaqyrymy jóndelip, 528 shaqyrymy qaıta jańǵyrtýdan ótken. Al osy jyly respýblıkalyq mańyzy bar joldyń 4,4 myń shaqyrymy qaıtadan qalpyna keltirildi. Jobalarǵa 100 myńnan astam qurylysshy jumyldyrylyp, jyldyń sońyna deıin uzaqtyǵy 654 shaqyrym ýchaske paıdalanýǵa beriledi.

Óńiraralyq ınfraqurylymdy júıeli túrde damytý boıynsha tapsyrmany oryndaý maqsatynda ótken jyldan bastap jergilikti jol jelilerin jóndeýdi qarjylandyrý tepe-teńdik negizde 2 ese ulǵaıyp, 150 mlrd teńgege deıin jetkizilgen.

2025 jylǵa qaraı jergilikti joldardyń 85 paıyzy jaqsy jáne qanaǵattanarlyq jaǵdaıda bolady dep kútilip otyr.

Avtokólik joldaryn normatıvtik kútip-ustaýdy jáne saqtaýdy qamtamasyz etý maqsatynda júrip ótý úshin aqy alý júıesin engizý jobalaryn iske asyrý jalǵasyn tapty.

Qazirgi ýaqytta jalpy uzaqtyǵy 471 shaqyrym bolatyn «Almaty-Qorǵas», «Almaty-Qapshaǵaı» jáne «Astana-Temirtaý» joldary aqyly júıege kóshti.

Eki jyl ishinde aqyly júıe boınysha taǵy 5,5 myń shaqyrym joldy iske qosý josparlanýda. Onyń esebinen avtokólik joldaryn kútip-ustaý shyǵyndary anaǵurlym azaıatyn bolady.