Eýrazııa musylman ǵulamalarynyń forýmy ótedi
Halyqaralyq forýmǵa QR Parlamenti Senatynyń Tóraǵasy Qasym-Jomart Toqaev, QR Din isteri jáne azamattyq qoǵam mınıstri Nurlan Ermekbaev, Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz jáne Parlament depýtattary qatysady. Sondaı-aq, jıynǵa Eýropa men Ortalyq Azııanyń 21 elinen 35-ten astam delegat, elimizdiń zııaly qaýym ókilderi, jazýshylar, teolog-ǵalymdar, oblystyń bas ımamdary da qatyspaq.
Sheteldik meımandar arasynda Reseı musylmandary dinı basqarmasynyń jáne múftıler keńesiniń tóraǵasy Ravıl Gaınýtdınniń, Túrkııa Respýblıkasy din isteri basqarmasy tóraǵacynyń orynbasary Selım Argýnnyń, Lıtva Respýblıkasy musylmandary dinı basqarmasynyń tóraǵasy, múftı Romas ıAkýbaýskastyń arnaıy baıandamalary kútiledi.
Alqaly jıynnyń maqsaty jańa zamandaǵy musylman qaýymynyń jaýapkershiligi men ózara túsinigin qalyptastyrý, álemdegi syn-qaterlerge jaýap berý, musylman úmbetiniń dinı ekstremızm men terrorızmge qarsy ımmýnıtetin arttyrý bolyp otyr. Budan bólek, jıynda ortaazııalyq tarıhı dinı mekteptiń rólin arttyrý, Elbasynyń «Rýhanı jańǵyrý» bastamasyna oraı qazaq topyraǵynan shyqqan álemge tanymal dinı tulǵalardyń eńbegin nasıhattaý, Eýrazııa elderiniń ortaq pátýalar bazasyn qalyptastyrý sekildi máseleler de qozǵalatyn bolady.
Qatysýshylar 2018 jyly Qazaqstanda ótetin Álemdik jáne dástúrli dinder lıderleriniń kezekti sezine ún qosyp, álemdik dinı kelisim men tatýlyqtyń qazaqstandyq modelin nasıhattaýǵa nazar aýdarady. Halyqaralyq basqosýda «Búgingi musylmannyń kelbeti» qujaty qabyldanyp, forýmǵa qatysýshylardyń Qarary jarııalanatyny josparlanǵan.
