Eýrazııa memleketteriniń parlamentshileri kópvektorly yntymaqtastyq máselelerin talqylady
ASTANA. QazAqparat - Máskeýde Eýrazııa memleketteri parlament spıkerleriniń birinshi keńesiniń otyrysyna Májilistiń Halyqaralyq ister, qorǵanys jáne qaýipsizdik komıtetiniń múshesi Abaı Tasbolatov qatysty.
«Eýrazııa óńiri HHІ ǵasyrdaǵy ortaq ıgiligi jolyndaǵy parlamentaralyq yntymaqtastyq» taqyrybynda ótken forým aıasynda eýrazııalyq keńistikte parlamentaralyq dıalogty damytý máseleleri jańa formattaǵy kezdesýlerde talqylandy. Bul týraly Májilistiń baspasóz qyzmetinen habarlandy.
«Eýrazııa parlamentshileri saıası, ekonomıkalyq, quqyqtyq jáne gýmanıtarlyq, sondaı-aq qorshaǵan ortany qorǵaý salalarynda kópvektorly yntymaqtastyqty keńeıtý týraly jańa formattaǵy kezdesýler barysynda áńgime órbitti. Budan bólek, depýtattar óńirdegi beıbitshilik pen turaqtylyqty nyǵaıtý, ekstremızmge qarsy kúres jáne dinaralyq, konfessııaaralyq dıalogty damytý problemalaryna erekshe nazar aýdardy», - delingen baspasóz baıanynda.
Aıta keteıik, Reseı Federatsııasy men Koreıa Respýblıkasy bastamashylyq jasaǵan Keńes otyrysyna Ázerbaıjan, Aýǵanstan, Belarýs, Iran, Qazaqstan, Kambodja, Koreıa, Pákistan, Tájikstan, Taıland pen Qytaı delegatsııalary qatysty.
