Eýrazııa medıa forýmy konsensýs izdeıtin halyqaralyq platformaǵa aınaldy – Qyrymbek Kósherbaev
Memlekettik hatshy óz sózinde dástúrli forýmda kóptegen ózekti máseleler talqylanatynyn atap ótti.
«Ótken kezeńde biz aýqymdy oqıǵalardyń kýási boldyq. Álem ózgerdi. Pandemııa, jahandyq ekonomıkalyq quldyraý, memleketter arasyndaǵy senimsizdik, álemniń jetekshi derjavalary arasyndaǵy tehnologııalyq soǵys, etıkalyq normalardyń ózgerýi jáne taǵy basqalary adamdardy biriktirip qana qoımaı, alýan túrli kózqarastarǵa da bóldi. Túrli pikirlerdi talqylap, konsensýs izdeıtin halyqaralyq platformaǵa aınalǵan Eýrazııalyq medıa forýmnyń mıssııasy da osynysymen mańyzdy. Biz jańa elorda – Nur-Sultanda Táýelsizdigimizdiń 30 jyldyǵyna oraı qurmetti áriptester men dostardy qarsy alýdamyz»,-dedi Qyrymbek Kósherbaev Eýrazııalyq medıa forýmnyń ashylýy kezinde.
Memlekettik hatshy forýmnyń tabysty jumysyna eldegi kóshbasshylar erekshe mán beretinin atap ótti jáne forým qatysýshylaryna tabys pen syndarly dıalog tiledi.
Buǵan deıin Memleket basshysy Qasym-Jomart Toqaev pen QR Tuńǵysh Prezıdenti – Elbasy Nursultan Nazarbaev forýmnyń ashylýyna lebiz joldaǵan edi.
