«Eýrazııa» konsortsıýmy Qazaqstanda munaı-gazdy óndirý kólemin eki ese ósire alady - U.Qarabalın

ASTANA. 8 qazan. QazAqparat - «Eýrazııa» konsortsıýmyn qurý arqyly Qazaqstannyń munaı-gaz óndirý kólemin eki ese ulǵaıtýǵa bolady.

Bul týraly búgin «KAZENERGY» munaı-gaz jáne energetıka kesheni uıymdary qaýymdastyǵynyń VIII Eýrazııalyq energetıkalyq forýmy aıasynda jýrnalısterdiń suraǵyna jaýap bergen QR Munaı jáne gaz mınıstri Uzaqbaı Qarabalın málim etti. Onyń habarlaýynsha, «Eýrazııa» konsortsıýmyn qurýdy «KAZENERGY» qaýymdastyǵy usynǵan bolatyn. Onyń negizgi maqsaty - munaı-gaz salasyndaǵy iri ári joǵary tehnologııasy bar kompanııalardyń basyn qosyp, Kaspıı mańyna jan-jaqty barlaý ótkizý. «Ol jerde kómirsýtek resýrstarynyń mol qory bar. Osy ýaqytqa deıin biz tek onyń mańaıyn ǵana barlap shyqtyq. Sonyń nátıjesinde 5-6 myń shaqyrym tereńdikte Qarashyǵanaq, Teńiz jáne Qashaǵan sııaqty alyp ken oryndary anyqtaldy. Al Kaspıı basseıiniń tereńdigi 20-25 shaqyrym ekendigin eskersek, Qazaqstannyń búgingi munaı-gaz óndirý kólemin eki ese ósirýge bolady», - dep atap kórsetti U.Qarabalın.