«Eýrazııa» kınofestıvaliniń men úshin mańyzy erekshe - «Yntyzarlyq» fılminiń rejısseri
ALMATY. 18 qyrkúıek. QazAqparat - Men árdaıym ózimdi tolǵandyrǵan taqyrypty ǵana tańdap alam. Bul týraly Almatydaǵy ІH «Eýrazııa» kınofestıvaliniń halyqaralyq baıqaýynda baq synap jatqan Qyrǵyzstannyń «Yntyzarlyq» fılminiń rejısseri Temir Bınazarov búgin baspasóz máslıhatynda málimdedi.
«Eýrazııa» kınofestıvaliniń men úshin mańyzy erekshe. Óıtkeni eń alǵashqy mártebeli júldemdi 2008 jyly osynda aldym. Onda rejısserge kásibı turǵydan baǵa berilip, moıyndalady», - deıdi T.Bınazarov. Onyń aıtýynsha, «Yntyzarlyq» fılmniń stsenarıimen 3-4 jyl jumys jasaǵan kórinedi. Túsirim aldynda akterdi tez tapqanymen, aktrısany uzaq izdepti. Oǵan 1,5-2 jyl ýaqyt ketken kórinedi.
Jalpy «Eýrazııa» kınofestıvaliniń halyqaralyq baıqaýyna bıyl 12 fılm qatysýda. Onyń ishinde Qazaqstan, Tájikstan, Grýzııa, Iran, Reseı, Italııa, Germanııa, Frantsııa, Túrkııa, Sıngapýr jáne Saýd Arabııasy men Germanııa birlesip túsirgen týyndylar bar.
