Eýrazııa kınofestıvaliniń alǵashqy syılyqtary tapsyryldy
Baǵdarlama qyzyl kilem rásimimen bastaldy. Saltanatpen bezendirilgen teatrdyń bas zalynda is-sharany festıval prezıdenti Ardaq Ámirqulov pen baǵdarlama dırektory Gúlnara Ábikeeva ashty.
Festıvalge qatysatyn búkil fılmderdi qamtıtyn treıler kórsetildi.
Oǵan qosa, kórermen qazylar alqasynyń múshelerimen tanysty. Sahnaǵa shyqqan sheteldik qonaqtar aldymen qazaq tilinde kem degende bir-eki sóz aıtýǵa tyrysty.
Saltanatty sharanyń basty tosynsyıy festıvaldiń arnaıy júldelerin tabystaý boldy.
«Ortalyq Azııa kınematografynyń damýyna qosqan úlesi úshin» júldesin ataqty ózbek rejısseri Álı Hamraev aldy, ol osy festıvalde halyqaralyq baıqaýdyń qazylar alqasyn basqarady.
«Búgin Qazaqstan jerine mereke keldi – álemdik kıno ókilderi sizdiń shańyraqta qonaqta. Meniń oıymsha, qıyn kezeńde bóten halyqtardy jyly qabyldaı alatyn adamdar keremet. «Eýrazııa» festıvali qaıta oraldy, eń bastysy osy. Biz ony saǵyndyq. Festıvalge jáne Qazaqstanǵa sáttilik», - dedi jıynda aǵynan jarylǵan 85 jastaǵy ózbek kınosynyń maıtalmany.
Taǵy bir arnaıy syılyq – «Qazaq kınematografyna qosqan úlesi úshin» mádenıettanýshy jáne qoǵam qaıratkeri Murat Áýezovke tabystaldy.
Baǵdarlama qazaqstandyq kınorejısser Sábıt Qurmanbekovtiń «Boran» kartınasynyń kórsetilimimen aıaqtaldy.
Ashylý saltanatyna deıin festıval ortalyǵynda alǵashqy baspasóz konferentsııasy ótti.
Aldymen jýrnalısterdiń aldynda is-shara uıymdastyrýshylary sóz sóıledi.
Gúlnar Ábikeevanyń aıtýynsha, bıylǵy festıvalde juldyzdy qazylar alqasy men óte myqty baǵdarlama jasalǵan.
«Bir kezderi bizde «Dınamıkalyq damyp kele jatqan qazaq kınosy», sodan keıin «Dınamıkalyq qazaq kınosy» baǵdarlamalary bolsa, qazir bizdiń kınematograf halyqaralyq baıqaýmen teń jeke ulttyq konkýrs ótkizýge múmkindik beretin deńgeıge jetti. XVI «Eýrazııa» kınofestıvaliniń basty ereksheligi men jańalyǵy - osy», - dedi ol.
Baıqaý baǵdarlamasynyń joǵary deńgeıiniń dáleli – baıqaýǵa qatysatyn tórt kartına óz eliniń atynan «Oskar» syılyǵyna usynylǵan.
Sonymen qatar, festıvalde birden tórt álemdik premera ótedi.
Taǵy úsh baspasóz konferentsııasynda ulttyq, halyqaralyq baıqaýlardyń jáne NETPAC (Azııa kınosyn ilgeriletý jónindegi halyqaralyq jeli) qazylar alqasynyń «tusaýkeseri» ótti.
Negizgi is-sharamen qatar Kınopark 10 Forum kınoteatrynda fılm kórsetilimderi bastaldy.
Halyqaralyq baıqaýdan «Il Boemo» (Chehııa – Italııa – Slovakııa; rejısser Petr Vatslav) jáne «Áıel» (Qytaı; rejısser Van Chao) fılmderi kórsetildi.
Ulttyq baıqaýdan – «Taý pııazy» (rejısser Eldar Shıbanov), «Zere» (rejısser Dáýren Qamshybaev) jáne «Ot» (rejısser Aıjan Qasymbek).
Al «Erekshe oqıǵa» konkýrstan tys baǵdarlamasy Bolgar rejısseri, ulttyq baıqaýdyń qazylar alqasynyń múshesi Mılko Lazarovtyń «Aga» kartınasymen ashyldy.
Ol búkil álem boıynsha kınofestıvalderde kóptegen marapat alǵan, al XIV «Eýrazııa» kınofestıvalinde úzdik rejıssýra úshin júlde alǵan.
