«Eýrazııa» kınofestıvaline qazaqstandyq 10 kartına qatysyp otyr
ASTANA. QazAqparat - «Eýrazııa» HІV halyqaralyq kınofestıvaliniń konkýrstyq jáne konkýrstan tys baǵdarlamalaryna qazaqstandyq 10 fılm qatysyp otyr. Olardyń barlyǵy Sh.Aımanov atyndaǵy «Qazaqfılm» kınostýdııasynda túsirilgen, dep habarlaıdy QazAqparat tilshisi.
Kınostýdııanyń baspasóz qyzmetinen málim etkendeı, bul jyly baǵdarlama 8 bólimnen turady. Olardyń ishindegi «Halyqaralyq baıqaý» men «Qysqametrajdy fılmder baıqaýy» - konkýrstyq. Bul bólimderge sáıkes kınostýdııa atynan tolyqmetrajdy «Ámire» (Djeff Vespa) men qysqametrajdy «Tyǵylmaq» (Venera Qaıyrjanova) baq synaýda.
«Eýrazııa» XIV HKF-niń negizgi konkýrsyna qazaqstandyq kartınalardan ózge mynadaı fılmder de qatysýda: rejısser ıAn MınMınniń «Qyzdar árdaıym baqytty» (Qytaı), rejısser Alekseı Fedorchenkonyń «Annanyń soǵysy» (Reseı), rejısser Marı Garelvaıstyń «Saýyq kesh aıaqtaldy» (Frantsııa), rejısser Hıdje Djongtyń «Avtostop» (Ońtústik Koreıa), rejısser Marııam Hatchanıdiń «Dede» (Grýzııa), Baný Sıvachıdiń «Kógershin» (Túrkııa), rejısser Rashıd Malıkovtyń «Tabandylyq» (Ózbekstan), rejısser Elızaveta Stıshovanyń «Súleımen taý» (Reseı, Qyrǵyzstan, Polsha), rejısser Djanıs Nordstyń «Ittiń atasy joq» (Latvııa, Polsha, Lıtva, Rossııa), rejısser Svetıslav Dragomırovıchtiń «Kókjıekter» (Serbııa), rejısser Mılko Lazarovtyń «Aga» (Bolgarııa, Germanııa, Frantsııa).
Halyqaralyq konkýrsqa barlyǵy 12 tolyqmetrajdy kartına jáne 35 qysqametrajdy fılmder joldandy.
Negizgi konkýrstyń qazylar alqasynyń quramynda rejısser, stsenarıst jáne prodıýser Van Sıaoshýaı, prodıýser Amır Esfandıarı, kınofestıvalderdi uıymdastyrýshy jáne baǵdarlama qurýshy Pıter Skarlet, «Oskar» syılyǵynyń ıegeri Gabrıella Krıstıanı, rejısser, kınodramatýrg Ermek Tursynov bar. Al qysqametrajdy kartınalardyń qazylar alqasynyń quramyna áıgili túrik rejısseri Semıh Kaplanoǵly, qazaqstandyq aktrısa Samal Eslámova, amerıkalyq operator Hıro Narıta, serbııalyq akter Mılosh Bıkovıch, sıngapýrlyq óner kýratory jáne rejısser Djeremı Chýa kiredi.
Bıylǵy jáne ótken jyldardaǵy túrki tildi halyqtardyń 10 úzdik kartınasy iriktelgen konkýrstan tys «Kerýen» baǵdarlamasynda Bolat Qalymbetovtiń «Talan» jáne Qýat Ahmetovtiń «Arýaq» kórkem fılmderi kórsetiledi.
Sonymen qatar, kınostýdııa «Eýrazııa júreginde» baǵdarlamasyna Turdybek Maıdan men Tilek Tóleýǵazynyń «Muzbalaq» jáne Adaı Ábildınovtiń «Kúltegin» tolyq metrajdy jańa anımatsııalyq kartınalaryn usynǵan. Budan bólek, osy jyly prokatqa shyqqan Begras Elýbaıdyń «Oazıs» jáne Eljas Rahymbekovtiń «Elfreeman» kórkem fılmderi kórsetiledi.
Sondaı-aq, «Obektıv» derekti fılmder bóliminde Vladımır Tıýlkınniń «13 kılometr» jáne Anvara Sadyqova men Ǵazız Nasyrovtyń «Qazaq bıi» fılmderi de bar.
Aıta ketsek, «Eýrazııa» XIV halyqaralyq kınofestıvali «Rýhanı jańǵyrý» baǵdarlamasyn júzege asyrý jáne elordamyzdyń 20 jyldyq mereıtoıyn atap ótý aıasynda 2018 jyldyń 1 shildesi men 7 shildesi aralyǵynda ótedi.
