Eýrazııa kindigindegi bas qalamyz - Astanaǵa 18 jyl toldy

Astana kúnin merekeleýge arnalǵan is-sharalar jyldaǵy dástúr boıynsha «Atameken» etnomemorıaldy kesheni alańynda Memlekettik týdy kóterý rásimimen bastaldy. Saltanatty rásim aıasynda Memleket basshysy - Qazaqstan Respýblıkasy Qarýly kúshteriniń Joǵarǵy Bas qolbasshysy  Nursultan Nazarbaev elimizdiń joǵary áskerı oqý oryndarynyń túlekterine ofıtserlik shen tapsyrdy.

Qazaqstan Prezıdentiniń qolynan 12 túlek - Qorǵanys mınıstrligi Qurlyq áskerleri áskerı ınstıtýtynyń, Іshki ister mınıstrligi Іshki áskerler áskerı ınstıtýtynyń jáne Ulttyq qaýipsizdik komıteti áskerı ınstıtýtynyń úzdik bitirýshileri shen aldy.

Elbasy jınalǵandarǵa arnaǵan sózinde memlekettik tý árbir qazaqstandyq úshin qasıetti qundylyq bolyp sanalatyn ulttyq birlik nyshany ekenin atap ótti.
- Bul - táýelsizdiginiń 25 jyldyǵyn bıyl toılaıtyn elimizdiń asqaq rámizi. Biz egemen Qazaqstandy osy kók tý astynda birge qurdyq. Shırek ǵasyr ishinde qýatty memlekettiń irgesi berik ǵımaratyn birlesip saldyq. Jaqynda ǵana respýblıkamyz BUU Qaýipsizdik keńesiniń turaqty emes múshesi bolyp saılandy. Álemdik qoǵamdastyq planetadaǵy beıbitshilik pen qaýipsizdikti qamtamasyz etý isine atsalysý syndy bıik mıssııany Qazaqstanǵa senip tapsyrdy.

Bul -  elimizdiń bıik bedeli men tabysty damýynyń moıyndalýy. BUU Qaýipsizdik keńesindegi jumys bizdiń týymyzdy burynǵydan da tanymal ete túsedi, - dedi Nursultan Nazarbaev.

Memleket basshysy respýblıkanyń joǵary áskerı oqý oryndarynyń barlyq túlekterin quttyqtap, qazaqstandyq patrıotızm túrli salada, sonyń ishinde eń aldymen Otanǵa qyzmet etýde kórinis tabatynyn aıtty.

- Búgin biz joǵary áskerı oqý oryndarynyń úzdik túlekterine ofıtserlik shender tapsyramyz. Osy kúnderi myńdaǵan qazaqstandyq jas oqýyn aıaqtap, úlken ómirge aıaq basady. Sizder óz joldaryńyzdy eldiń bas baıraǵynyń aldynda, saltanatty jaǵdaıda bastap otyrsyzdar. Bul kezdeısoqtyq emes, óıtkeni sizder qoǵamda qurmetke ıe aıryqsha mamandyqty tańdadyńyzdar. Sizder birneshe jyldy jaqsy bilim alýǵa, jańa mashyqtardy ıgerýge, dostyq pen ózara kómektiń qundylyǵyn túsinýge arnadyńyzdar. Endi osynyń bárin tájirıbede qoldaný kerek, - dedi Nursultan Nazarbaev.

Elbasy memlekettik tý kóterý rásimi dástúr boıynsha Astana kúnine arnalǵan is-sharalardyń bastaýy bolyp sanalatynyna nazar aýdardy.
Bıyl kámelettik jasqa tolǵan bas qalamyzdyń elimiz ómirindegi orny men róline toqtalyp ótken Nursultan Nazarbaev, mereıli mereke qarsańynda elordanyń mıllıonynshy turǵyny ómirge kelgenin aıtty. «Búgin erteńgisin Muhamedııarovtar otbasynda Astananyń mıllıonynshy turǵyny ómirge kelgenin zor qýanyshpen habarlaımyn. Sábıdiń anasy - balabaqsha tárbıeshisi, ákesi - elektr monteri. Endi bizdiń elorda mıllıon turǵyny bar qalalar qataryna endi», - dedi Nursultan Nazarbaev.

Memleket basshysy barsha Qazaqstan halqyn Astana kúnimen quttyqtap, beıbitshilik pen tatýlyq, tynyshtyq pen baq-bereke tiledi. 
Astana kúnine arnalǵan joǵary deńgeıdegi sharalardyń biri - Memleket basshysy qatysqan saltanatty qabyldaý. Eńsesi bıik elordamyzdyń týǵan kúnine arnalǵan saltanatty qabyldaýǵa Parlament depýtattary, memlekettik organdardyń, dıplomatııalyq korpýstyń, zııaly qaýymnyń, isker toptar men mádenı-aǵartýshylyq ortanyń ókilderi qatysty.

Memleket basshysy bıyl Astana kúni aıryqsha mánge ıe ekenin, óıtkeni el Táýelsizdiginiń 25 jyldyǵy aıasynda toılanatynyn aıtty.

- Elorda kez kelgen elde bar jaqsy nárseniń bárin ózine shoǵyrlandyra otyryp, naqty memlekettiń ómirin beıneleıdi. Elorda - árbir ulttyń ustyny. Qazaqstandyqtar úshin Astana da osyndaı megapolıske aınaldy. Jańa elordanyń negizin qalaý Otanymyzdyń táýelsizdik tarıhynyń altyn paraqtary bolyp sanalady. Astana biz úshin -  birigýdiń, tutastyqtyń, halqymyzdyń óz kúshine, erekshe múmkindikterine degen seniminiń rýhtandyrýshy rámizi. Astana rýhy ǵasyrlyq dástúrlerdi, danalyqty, halyqtyń shyǵarmashylyǵyn, Qazaqstan halqynyń ótkenin, qazirgisi men keleshegin sabaqtastyrady. Bizdiń memleketimizde, ekonomıka men qoǵamda táýelsizdik jyldary bolǵan túbegeıli ózgerister elordamyzda aınadaǵydaı kórinis tapqan, - dedi Nursultan Nazarbaev.
Elbasy osy jyldary Astanada qalanyń odan ári damýyna yqpal etken halyqaralyq deńgeıdegi kóptegen iri is-sharalar ótkenine toqtaldy.

- Astana EYQU-nyń jańa myńjyldyqtaǵy alǵashqy sammıtin qabyldady, EKSPO dúıejúzilik kórmesiniń 17-shi astanasy atandy. Munda álemniń 57 ıslam memleketiniń kóshbasshylary qatysqan konferentsııa jáne Qazaqstandy tanymal etken basqa da kóptegen halyqaralyq forýmdar ótti. Bul - bizdiń astanamyzdy álemdik qoǵamdastyqqa joǵary deńgeıde tanylýynyń kórsetkishi. Astana búginde bolashaqqa kóz tigedi, qalanyń damý qarqyny ony ómir sapasynyń jańa standarttarynyń úlgisine, búkil Eýrazııa úshin ınnovatsııalyq damýdyń ýrbanızatsııalyq modeline aınaldyrady. Munda jańa óndirister iske qosylyp, shaǵyn jáne orta bıznes damyp jatyr. Qala ınfraqurylymy jaqsarýda, jańa mádenıet jáne demalys nysandary ashylýda, - dedi Memleket basshysy.

Memleket basshysy atap ótkendeı, elorda qazirgideı kúrdeli ýaqytta da qarqynyn túsirmeı, qalǵan óńirlerdi qoldap, búkil Qazaqstanǵa sarqylmaıtyn kúsh-qýat berip otyr.

- Osy ýaqyt ishinde úlken joldy artqa tastadyq, kóp nárse jasaldy, biraq jasaıtynymyz áli de kóp. Biz buǵan daıynbyz, ol úshin qajetti múmkindikter men qulshynys bar. Astana bizdiń táýelsizdigimizdiń, damýdyń shynaıy kórinisine, azattyq pen ınnovatsııa rýhyna aınaldy. Qazaqstandyqtar úshin jańa elorda, bul - Otanymyzdyń júrekke jaqyn, tartymdy ortalyǵy, - dedi Nursultan Nazarbaev.

Sońynda Memleket basshysy barsha Qazaqstan halqyn merekemen quttyqtap, baqyt pen baq-bereke tiledi.

Almaǵaıyp kezeńde el astanasyn Arqaǵa kóshirý jónindegi batyl qadamy eń utymdy sheshim dep baǵalanǵan Nursultan Nazarbaevtyń basty jobasynyń biri - sáýleti men dáýleti kúnnen kúnge asyp, aıbyny men ajaryna álem kóz tikken elordamyz ben elbasynyń týǵan kúni qatar kelip, búginde egiz uǵymǵa aınalǵandaı. Muny Astana kúni Memleket basshysynyń atyna shetel memleketteri men úkimet basshylarynan kelgen tolassyz quttyqtaýlar legi de aıǵaqtap turǵandaı. Atap aıtqanda, Reseı Federatsııasynyń prezıdenti Vladımır Pýtın óz quttyqtaýynda eki el arasyndaǵy odaqtastyq pen strategııalyq seriktestikti damytýdaǵy Nursultan Nazarbaevtyń eńbegine baǵa jetpeıtinin aıtady. Sondaı-aq ol Elbasynyń eýrazııalyq keńistiktegi tatý kórshilikti, turaqtylyq pen qaýipsizdikti qamtamasyz etýge qosqan úlesin atap ótken. «EAEO kóbine-kóp Sizdiń jeke kúsh-jigerińiz arqyly kópjaqty yntymaqtastyqtyń álemdik arenadaǵy eleýli bedelge ıe tıimdi qurylymy retinde bekidi. Sizben dostyq qarym-qatynasymyzdyń jáne Reseı-Qazaqstan baılanystarynyń búkil aýqymyn odan ári nyǵaıtý baǵytyndaǵy birlesken syndarly jumystardyń jalǵasatynyna senemin»,  - delingen hatta.

V.Pýtın Qazaqstan Prezıdentine zor densaýlyq, baqyt jáne memlekettik qyzmette jańa tabystar tiledi.

Belarýs eliniń basshysy A.Lýkashenko Nursultan Nazarbaevtyń Qazaqstan halqyna qajyrly qyzmeti eldegi júrgizilip jatqan aýqymdy ózgeristerdiń tabysty bolýynyń kepili ekenin atap ótti. «Sizdiń bastamalaryńyzdyń arqasynda Qazaqstan ıntegratsııalyq ózara is-qımyl máselelerinde de, álemdik arenada da qýatty, serpindi damyp kele jatqan memleket retinde bedelge ıe bolyp otyr. Belarýs pen Qazaqstan arasyndaǵy joǵary deńgeıdegi dástúrli dıalogtyń jalǵasýy elderimizdiń baq-berekesin arttyrý jolyndaǵy jemisti yntymaqtastyqty jan-jaqty nyǵaıtýǵa yqpal etetinine senimdimin», - delingen jedelhatta.

Qyrǵyz eliniń prezıdenti Almazbek Atambaev Nursultan Nazarbaevty týǵan kúnimen quttyqtap, elderimizdiń odaqtastyq qarym-qatynasy men strategııalyq seriktestigin nyǵaıtý isindegi Qazaqstan Prezıdentiniń eńbegi Qyrǵyzstanda joǵary baǵalanatynyn atap ótti.

Elbasynyń týǵan kúnine oraı ıgi tilekterin joldaǵan Tájikstan Respýblıkasynyń prezıdenti Emomalı Rahmon Qazaqstan Nursultan Nazarbaevtyń basshylyǵymen áleýmettik-ekonomıkalyq damýda jáne álemdik arenadaǵy bedelin nyǵaıtýda eleýli jetistikterge jetkenin, Reseı Federatsııasy úkimetiniń tóraǵasy Dmıtrıı Medvedev Nursultan Nazarbaevtyń elderimiz arasyndaǵy odaqtastyq jáne strategııalyq seriktestik qatynastardy damytýdaǵy eńbegi zor ekenin atap ótken.