Eýrazııa qaıta birigip jatyr - Nursultan Nazarbaev
Elbasy «Bir beldeý, bir jol» bastamasy jetistikteriniń biri - geografııa men teńsizdik syn-tegeýrinderin oraǵytý ekenin atady.
«Eýrazııa qaıta birigip jatyr. Eki myń jyl burynǵydaı qurlyǵymyzdyń shalǵaı jatqan túrli bólikteri bir arnaǵa toǵysty. Qysqa ýaqyttyń ishinde kúrdeli tabıǵı landshaftar men geosaıası qarama-qaıshylyqtardy bastan ótkerip, birlesip ekonomıkalyq dáliz qura bildik. Zamanaýı logıstıkanyń, memleketterdiń ózara túsinistiginiń arqasynda Ońtústik-Shyǵys Azııadaǵy taýarlar Soltústik Eýropa qalalaryna bar bolǵany 2 aptanyń ishinde jetip jatyr. Bunyń negizinde pragmatızm, órkendeýge umtylý jatyr», - dedi N.Nazarbaev.
Nursultan Nazarbaev Qazaqstannyń Eýrazııanyń dál ortasynda tıimdi ornalasqanyn eske saldy. Bizdiń memleketimiz arqyly Azııa men Eýropa qysqa jolmen baılanysyp jatyr.
«Qolda bar tranzıttik áleýetti júzege asyrý maqsatynda «Nurly jol» ulttyq baǵdarlamamyzdy «Bir beldeý, bir jol» bastamasymen ımplementatsııaladyq. Sońǵy 10 jylda Qazaqstan 30 mlrd AQSh dollary kólemindegi qarajatty ınfraqurylymdy, kóliktik-logıstıkalyq aktıvter men quzyretterdi damytýǵa ınvestıtsııalady. 3 myń shaqyrym temir joldy, 12,5 myń shaqyrym avtomobıl joldaryn paıdalanýǵa berdik nemese jóndeýden ótkizdik. Otandyq teńiz jáne áýe aılaqtary qaıta quryldy. Elimizde qysqa ýaqyt ishinde zamanaýı básekege qabiletti tranzıttik hab quryldy. Bul joldardyń barlyǵy biz arqyly, Ortalyq Azııa arqyly, bizdiń kórshilerimiz arqyly basqa elderge ótip jatyr», - dedi Elbasy.
N.Nazarbaev 2016 jyldan bastap «Nurly jol» baǵdarlamasy «Jibek joly ekonomıkalyq beldeýimen» túıindesip, tabysty júzege asyrylyp jatqanyn eske saldy.
«Eýropany Qytaımen Reseı jáne Qazaqstan arqyly ótetin «Batys Eýropa – Batys Qytaı» joǵary sapaly qurlyqaralyq avtomagıstrali jalǵap jatyr. Bizdiń elimiz Qytaıdyń Tynyq muhıtyndaǵy Lıanıýngan aılaǵynda logıstıkalyq termınal saldy. «Qazaqstan - Túrikmenstan - Iran – Parsy shyǵanaǵy» temir joly qaıta iske qosyldy», - dedi Elbasy.
Avtor: Sadyq Ákejanov