«Eýrazııa» halyqaralyq kınofestıvali: 30 elden 30-dan astam fılm kórsetiledi

«Bıyl festıval 15-shi jyl qatarynan ótedi, mereıtoı desek te bolady. Osy ýaqyt ishinde kóptegen otandyq jáne sheteldik fılmderdiń tusaýy kesilip, talaı baıqaýlardan júldemen oraldy. Kınofestıvaldegi taǵy bir ózgeris, naqty nátıjege jumys isteý. Jasyratyny joq, buǵan deıin festıvalge shetelden kóptegen kıno mamandary men ártisteri keletin. Búginde biz ony qysqartyp, sapaǵa jumys isteýge kóshtik. Qazirgi ýaqytta «Eýrazııa» kınofestıvaliniń halyqaralyq deńgeıi ósip keledi», - dedi festıvaldiń atqarýshy dırektory Qanat Tórebaı búgin ótken baspasóz máslıhatynda.

Onyń aıtýynsha, kınofestıval baǵdarlamasynda otandyq fılmderge kóp kóńil bólingen. Ondaǵy maqsat shetelden keletin qonaqtar aldynda tól týyndylardy dáripteý.

«Kınofestıval baǵdarlamasynda otandyq fılmderge arnalǵan «Eýrazııa júreginde» atty arnaıy bólim bar. Onda ózimizde sońǵy jyldary túsirilgen 12 fılm kórsetiledi. Al jalpy kınofestıvalge 30 elden 30-dan astam týyndy qatysady. Sondaı-aq, ádilqazylar alqasy quramynda, shetelden arnaıy shaqyrtylǵan kıno salasynyń úzdik mamandary bar. Jáne olar úsh quramda jumys isteıtin bolady. ıAǵnı negizgi baıqaý, qysqa metrajdy fılmder jáne anımatsııalyq týyndylar. Odan bólek, bir top amerıkalyq kınokompanııanyń basshylary men prodıýserlerin kútip otyrmyz. Olarǵa qazaqstandyq kıno óneriniń búgingi áleýetimen tanystyra otyryp, birikken jobalardy qolǵa alý múmkindigin qarastyratyn bolamyz», - dedi ol.

Aıta keteıik, atalǵan sharanyń ashylý saltanaty búgin saǵat 18:00-de elordadaǵy «Qazaqstan» Ortalyq kontsert zalynda ótedi.

Buǵan deıin Gollıvýdtyń tanymal kınoprodıýserleri Qazaqstanǵa keletini týraly habarlaǵan bolatynbyz.

Odan bólek, kınofestıval uıymdastyrýshylary sharanyń qurmetti qonaǵy retinde tanymal túrik akteri Býrak Ozchıvıttiń keletinin málim etti.

Sondaı-aq, Mádenıet jáne sport mınıstrliginiń ókilderi áıgili «Forsaj» fılminiń epızody Qazaqstanda túsirilýi múmkin ekendigin aıtqan bolatyn.