«Eýrazııa» festıvali Qazan kıno festıvalimen seriktestik ornatty
ASTANA. QazAqparat - Qazan halyqaralyq musylman kıno festıvaliniń dırektory Mılıaýsha Aıtýǵanova men Qazaqstandaǵy «Eýrazııa» halyqaralyq festıvaliniń baǵdarlamalar dırektory Dıana Áshimova yntymaqtastyq týraly kelisimge qol qoıdy. Bul týraly «QazAqparat» HAA Qazan halyqaralyq musylman kıno festıvaliniń saıtyna silteme jasap habarlaıdy.
Qazaq delegatsııasynyń quramynda kelisimge qol qoıý rásimine Túrik kıno qaýymdastyǵynyń múshesi, prodıýser Qanat Tórebaı qatysty.
Onyń aldynda Sharm ál-Sheıhta, Shveıtsarııanyń FIFOG Shyǵys kınosy festıvalimen, Ystanbuldyń «Túrik álemi» derekti kıno festıvalimen kelisimderge qol qoıylǵan bolatyn.
«Bıyl men Qazaqstandaǵy XIV «Eýrazııa» Halyqaralyq festıvaline bardym. Bizdiń kózqarasymyz ortaq, kontentimiz óte jaqyn. Osy kelisimge qol qoıylýynyń sımvoldyq máni bar», - dedi Mılıaýsha Aıtýǵanova.
Qazaqstandyq fılmder jyl saıyn Qazan festıvaliniń túrli atalymdaryna usynylady. Bul joly «Mama», «ıA vernýlsıa», «Stoıkost» atty fılmder usynylǵan.
«Tatarstan - Qazaqstanǵa jaqyn, baýyrlas respýblıka. Bizdiń tilimiz, tarıhymyz, mentalıtetimiz, ónerimiz, ǵylymymyz jaqyn. Taǵdyr bizdi jolyqtyrǵanyna qýanyshtymyn. Biz Almatyda rejısser Sháken Aımanovqa arnalǵan festıval ashamyz. Túrki tildes elderdiń kınosyna mán beriledi», - dedi Qanat Tórebaı.
Mılıaýsha Aıtýǵanova jýyq arada Tatarstan Qazaqstanmen birlese fılm túsirý jónindegi yntymaqtastyq týraly kelisimge keletinin jetkizdi.
