Eýrazııa ekonomıka odaǵynyń keńesi shokolad sapasyna qoıylatyn talaptardy bekitti

ASTANA. QazAqparat - Onlaın rejımde ótken Eýrazııalyq ekonomıkalyq komıssııa keńesiniń otyrysynda qatysýshylar EAEO-ǵa múshe memleketterdiń bırjasynda baǵaly qaǵazdardy ornalastyrýǵa jáne erkin transshekaralyq ruqsatty aıqyndaıtyn, shokolad óndirisine qoıylatyn talaptardy kúsheıtetin birqatar qujatty qabyldady, dep habarlaıdy QazAqparat.

Qazaqstandyq tarapty Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın basqardy.

EEK-ke múshe memleketterde uıymdastyrylǵan saýda-sattyqta baǵaly qaǵazdardy ornalastyrýǵa jáne aınalysqa transshekaralyq ruqsat berý týraly qabyldanǵan kelisim ortaq bırjalyq naryqta baǵaly qaǵazdarmen emıssııalyq jáne saýda operatsııalarynyń erkindigin qamtamasyz etýge, biryńǵaı Eýrazııalyq ekonomıkalyq keńistik memleketteriniń bırja naryǵynyń ótimdiliginiń ósimine jaǵdaı jasaýǵa baǵyttalǵan.

Bul máselege EEK ekonomıka jáne qarjy saıasaty jónindegi alqa múshesi Baqytjan Saǵyntaev bastamashylyq etti jáne buǵan deıin qazaqstandyq tarap qoldady.

Sondaı-aq, EEK Keńesiniń sheshimimen Keden odaǵynyń «tamaq ónimderiniń qaýipsizdigi týraly» tehnıkalyq reglamentine ózgerister engizildi.

Bul tutynýshylardy shokolad ónimderin satyp alý kezinde jańylysýdan saqtaıdy.

Atap aıtqanda, shokolad ónimderine ósimdik maıyn, shokolad dámin ımıtatsııalaıtyn hosh ıister qoldanýǵa tyıym salatyn arnaıy talaptar qoıyldy (birqatar erekshelikter bar).

Shokolad ónimderi men kakao ónimderiniń sáıkestendirý kórsetkishteri resmı túrde engizildi (aşy, qara, qarapaıym, tátti, sút jáne t.b.), kakao, kakao maıy jáne basqa ıngredıentterdiń qurǵaq qaldyqtarynyń mınımaldy paıyzy kórsetilgen.

EAEO perımetri elderiniń óndirýshilerine qoıylatyn biryńǵaı talaptardyń derekterin mindetti retinde engizý jáne olardyń saqtalýyn baqylaý adal básekeni damytý úshin jaǵdaı jasaýǵa múmkindik beredi.

Sonymen qatar, otyrysta qyzmetterdiń biryńǵaı naryǵyn, munaı men munaı ónimderiniń ortaq naryqtaryn qalyptastyrý, makroekonomıkalyq saıasat, memlekettik satyp alýlar kezindegi ózara banktik kepildikter, EAEO elektr energııasynyń jalpy naryǵyndaǵy elektr energııasynyń ortalyqtandyrylǵan saýdasyn uıymdastyrý, taýarlardy bajsyz ákelý normalaryn ózgertýdiń oryndylyǵy salalaryndaǵy biryńǵaı ekonomıkalyq keńistikke qatysýshy elderdiń múddesin qozǵaıtyn máseleler qaraldy.

Foto: primeminister.kz