Eýrazııa damý bankiniń keńesi Baqytjan Saǵyntaevtyń tóraǵa laýazymyndaǵy ókilettigin uzartty

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Eýrazııa damý bankiniń (EADB) Basqarma tóraǵasy Andreı Belıanınovpen kezdesip, beınekonferentsııa baılanysy rejıminde Bank keńesiniń otyrysyn ótkizdi. Bul týraly primeminister.kz habarlaıdy.

Kezdesý barysynda B. Saǵyntaev pen A. Belıanınov Bank qyzmetiniń aǵymdaǵy jáne perspektıvalyq baǵyttaryn talqylady.

EADB-ǵa múshe elderdiń qatysýshylary bank qyzmetiniń negizgi qarjylyq nátıjeleri men halyqaralyq qarjy ınstıtýttarymen yntymaqtastyq keleshegin qarady. Sondaı-aq, básekege qabilettilikti arttyrý maqsatynda birlesken ıntegratsııalyq jobalardy iske asyrýǵa kóńil bólindi.

Sonymen qatar banktiń 2018-2022 jyldarǵa arnalǵan strategııasy qaraldy. Keńes Qazaqstan Respýblıkasynyń Bank keńesindegi ókili B. Saǵyntaevtyń EADB keńesiniń tóraǵasy laýazymyndaǵy ókilettigin uzartty.

Eýrazııa damý banki 2006 jyldyń 12 qańtarynda qol qoıylǵan memleketaralyq kelisim negizinde qurylǵan. Bankti qurý bastamasyn Qazaqstan men Reseı prezıdentteri usynǵan.

Bank múshe memleketterdiń ekonomıkalyq ósimine járdemdesýge, olardyń arasyndaǵy saýda-ekonomıkalyq baılanystardy keńeıtýge jáne ınvestıtsııalyq qyzmetti júzege asyrý arqyly eýrazııalyq keńistikte ıntegratsııalyq úderisterdi damytýǵa baǵyttalǵan halyqaralyq qarjy uıymy. Operatsııalardy oryndaıtyn eń iri elder - Qazaqstan, Reseı jáne Belarýs.