Eýrazııa damý banki 500 mln. dollarlyq eýrooblıgatsııasyn ornalastyrdy
ALMATY. 23 qyrkúıek. QazAqparat - Eýrazııa damý banki 7 jyldyq 500 mln. dollardyń eýrooblıgatsııa shyǵarylymyn ornalastyrýdy aıaqtady.
Halyqaralyq qarjy ınstıtýtynyń baspasóz qyzmetiniń habarlaýynsha, banktiń bul eýrooblıgatsııalaryna degen suranys usynystan 8 ese asyp túsip, 4 mlrd. dollardy quraǵan. Joǵary suranystyń nátıjesinde ol bir kúnde túgel taratylyp ketken. Sonyń nátıjesinde qundy qaǵazdyq kiristiligi batapqyda jarııalanǵan spredtegi 337,5-350 bazıstik pýnkten 300-ge deıin tómendegen. Alaıda bul qatysýshy ınvestorlardyń sanyna aıtarlyqtaı ózgeris ákelmegen. Ótinishter kitabyna barlyǵy 315 ınvestor qatysyp, shyǵarylymnyń 40 paıyzǵa jýyǵyn AQSh, 27 paıyzyn - Ulybrıtanııa, 8 paıyzyn - Germanııa men Avstrııa, 8 paıyzyn - Shveıtsarııa, al 17 paıyzyn ózge aımaqtar satyp alǵan. Jalpy Eýrazııa damý bankiniń bul eýrooblıgatsııalardyń ornalastyrylýyn Deutsche Bank, HSBC, BNP Paribas jáne J.P.Morgan uıymdastyrǵan bolatyn. Onda shyǵarylymnyń 77 paıyzyn ınvestıtsııalyq qorlar, 19 paıyzyn bankter, 4 paıyzyn ózge ınvestorlar ıelengen kórinedi.
