«Eýrazııa Barysy» dodasynyń júlde qory 20 mln teńge boldy
ASTANA. QazAqparat - Qazaq kúresinen «Eýrazııa Barysy» xalyqaralyq týrnıriniń jalpy júlde qory 20 mıllıon teńgeni qurap otyr, dep xabarlaıdy QazAqparat.
«Júlde qory 20 mıllıon teńge. Birinshi oryn alǵan palýanǵa 10 mıllıon, ekinshige - alty mıllıon, úshinshige - tórt mıllıon beriledi», - dedi Qazaq kúresi federatsııasynyń vıtse-prezıdenti Sársen Quranbek Ortalyq kommýnıkatsııalar qyzmetinde.
Onyń sózine qaraǵanda, týrnır 1 jeltoqsanda tórtinshi márte ótpek. Oǵan Grýzııa, Mońǵolııa, Polsha, Reseı, Tájikstan, Túrkııa, Ózbekstan, Qazaqstan elderinen palýandar qatysady dep kútilýde.
Qatysýshylar barlyq segiz salmaqta óner kórsetedi. «Qazaqstan Barysy» qazaq kúresin damytý qorynyń tóraǵasy Arman Shoraevtyń atap ótkenindeı, atalmysh dodany tikeleı efırde qazaqstandyq telearnalardan bólek, reseılik, túrkııalyq telearnalar da kórsetedi.
