«Eýrazııa barysy» 1 jeltoqsanda ótedi
ASTANA. QazAqparat - Qazaq kúresinen dástúrli túrde uıymdastyrylyp kele jatqan «Eýrazııa barysy» halyqaralyq týrnıri 1 jeltoqsan kúni ótedi. Bıyl bul doda tórtinshi ret uıymdastyrylady, dep jazady massaget.kz.
2016 jylǵy «Eýrazııa barysy» Almaty qalasyndaǵy «Almaty Arena» sport kesheninde ótedi. Halyqaralyq jarysqa Grýzııa, Mońǵolııa, Polsha, Reseı, Tájikstan, Túrkııa, Ázerbaıjan jáne Qazaqstan quramalary qatysady.
Aıta keteıik, «Eýrazııa barysy» dodasy komandalyq júıede ótedi. 2013 jylǵy «Eýrazııa barysynda» qazaq balýandary fınalda mońǵoldardy jeńip, jeńis tuǵyrynan kóringen bolatyn.
2014 jyly qazaqtyń qaıtalanbas tulǵasy Balýan Sholaqtyń (Nurmaǵambet Baımyrzauly) 150 jyldyq mereıtoıyna arnalyp ótkizilgen dodada mońǵol balýandary fınalda Qazaqstan quramasyn jeńip, bir jyl buryn ketken esesin qaıtarǵan-dy.
Al 2015 jylǵy doda Qazaq handyǵynyń 550 jyldyǵyna arnalyp ótkizildi. Fınalda qazaq-ózbek balýandary jolyǵyp, otandastarymyz 5:2 esebimen jeńiske jetken edi.
Bıylǵy týrnır Qazaqstan táýelsizdiginiń 25 jyldyǵy men Almaty qalasynyń 1000 jyldyǵyna arnalady. Saıysqa 8 elden, 130 qatysýshy keledi dep josparlanǵan.
