Qazaqstandyq bankke básekelestik zańyn buzdy degen aıyp taǵyldy
ASTANA. KAZINFORM – Básekelestikti qorǵaý jáne damytý agenttigi Eýrazııa banki qyzmetinen zań buzýdy anyqtady.
Agenttik taratqan habarlamada aıtylǵandaı, avtonesıe rásimdeý kezinde klıentterge KASKO shartyn tek affılıırlengen saqtandyrý kompanııasy SK Eýrazııamen ǵana jasaý usynylǵany týraly shaǵym túsken. Taldaý nátıjesinde 2024 jyly berilgen avtonesıelerdiń 98 paıyzdan astamy dál osy saqtandyrý uıymy arqyly rásimdelgeni anyqtaldy.
— Agenttik júrgizgen taldaý nátıjesinde naryqta anaǵurlym tıimdi shart boıynsha qyzmet kórsetetin ózge saqtandyrý kompanııalarynyń bar ekeni belgili boldy. Saqtandyrý uıymdary bankterdiń naqty bir saqtandyrý kompanııasynyń qyzmetin májbúrli túrde usynýy olardyń qarjylyq qyzmetine zalal keltirip, básekelestikti shekteýi múmkin ekenin rastady.
Qoldanystaǵy zańnamada qaryz alýshylardy saqtandyrý uıymyn tańdaýda shekteýge tyıym salynady, — delingen habarlamada.
Tekserý nátıjesinde bank básekelestik zańnamasyn buzý belgileriniń baryn óz erkimen moıyndap, olardy joıý boıynsha sharalar qabyldady.