Eýrazııa álemniń basty azyq-túlik ortalyǵyna aınalýy ábden yqtımal — Memleket basshysy

ASTANA. KAZINFORM — Jahandyq asharshylyq týyndaǵan jaǵdaıda Eýrazııa azyq-túlikpen qamtamasyz etetin negizgi ortalyq bolýy ábden yqtımal. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty. 

Eýrazııa álemniń basty azyq-túlik ortalyǵyna aınalýy ábden yqtımal — Memleket basshysy
Foto: Aqorda

— Ótken aptada Astanada issaparmen bolǵan NVIDIA kompanııasynyń basshysy, jańa tolqyndaǵy iri kásipker Djensen Hýang Qazaqstannyń aýyl sharýashylyǵy salasyna jasandy ıntellektiniń tásilderin engizetin kez keldi dep, óz pikirin aıtyp ketti. Menińshe, bul — óte oryndy usynys. Ony jedel qarqynmen iske asyrýymyz kerek. Elimiz osy belesti oıdaǵydaı eńserip alsa, álemdik aýqymdaǵy azyq-túlik tapshylyǵy, ıaǵnı jahandyq asharshylyq týyndaǵan jaǵdaıda Eýrazııa azyq-túlikpen qamtamasyz etetin negizgi ortalyq bolýy ábden yqtımal ekenine kúmán joq, — dedi Qasym-Jomart Toqaev.

Prezıdenttiń aıtýynsha, elimizde iri sý kózderine jaqyn ornalasqan úlken aýmaqty alyp jatqan jer alqaptary bar.

Sol jerlerdi sýarmaly eginshilikke paıdalaný dástúrli daqyldardyń ónimdiligin 2-2,5 ese kóbeıtýge yqpal etedi.

— Jańa alqaptardy ıgerý kezinde sý únemdeýdiń ozyq tásilderin jáne agrohımııalyq tehnologııalardy qoldaný asa mańyzdy. Biraq elimizde bul jumystyń tıimdiligi áli de tómen, — dedi Memleket basshysy.

Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.