EýrAzEQ-tyń monopolııaǵa qarsy kodeksi 2015-20156 jyldary qabyldanýy múmkin

Búgin QR Parlamenti Májilisinde ótken «Qazaqstan Respýblıkasynyń keıbir zańnamalyq aktilerine básekelestik máseleleri boıynsha ózgerister men tolyqtyrýlar engizý týraly» zań jobasyn talqylaýǵa arnalǵan dóńgelek ústel barysynda Eýrazııalyq ekonomıkalyq komıssııanyń básekelestik jáne monopolııaǵa qarsy retteý mınıstri - alqa múshesi Nurlan Aldabergenov osylaı málim etti.

Eýrazııalyq ekonomıkalyq komıssııanyń Alqa múshesi sóz arasynda búgingi jaǵdaıdaǵy úsh eldiń monopolııaǵa qarsy zańnamasyndaǵy erekshelikter men qaıshylyqtarǵa toqtalyp ótti. «Al talqylanyp otyrǵan zań jobasy úsh eldiń básekelestiktiń biryńǵaı qaǵıdalary men qaǵıdattary týraly kelisimge sáıkes keledi. Sonymen qatar, búgingi tańda negizgi jumystardyń biri BEK aıasyndaǵy naryqtarǵa ený kedergilerin alyp tastaýda bolyp otyr», - deıdi N. Aldabergenov.

Sonymen qatar, komıssııa múshesi EýrAzEq aıasynda qabyldanýy múmkin ortaq monopolııaǵa qarsy zańnamaǵa toqtala kele, bul qujattyń ulttyq zańnamany tolyqtyra túsetinin atap ótti. «Biz qazir «Básekelestik týraly» zań jobasyn qarap jatyrmyz. Kelesi jyly shildede «Básekelestik týraly» úlgi zańyn qabyldaımyz. Bul qujat usynys sıpatynda bolady jáne onda monopolıster tarapynan jasalýy múmkin buzýshylyqtarǵa qarsy áreket etýdiń  eń úzdik ádisteri kórinis tabady. Sol qujat qabyldanǵan soń ár memleket óz zańnamasyn soǵan sáıkestendiredi. Sosyn biraz ýaqyt ótken soń zańnyń tıimdiligine qaraı ortaq Kedendik kodeks sekildi monopolııaǵa qarsy kodeks qabyldanady. Bul shamamen 2015-2016 jyldary bolýy yqtımal», - dedi ol.