EýrAzEQ-tiń 151 kelisiminiń 87-si óz kúshinde qalady - N.Nazarbaev
MINSK. QazAqparat - EýrAzEQ-tiń 151 kelisiminiń 87-si óz kúshinde qalady. Bul týraly Mınskide Eýrazııalyq ekonomıkalyq qoǵamdastyqtyń memleketaralyq keńesiniń otyrysynda QR Prezıdenti Nursultan Nazarbaev málim etti.
QR Prezıdentiniń atap ótýinshe, Eýrazııalyq ekonomıkalyq qoǵamdastyqqa qatysty 151 kelisimniń 87-si saqtalyp, 64-i óz kúshin joıatyn bolady.
«Búgingi tańda úsh el ǵana, Qazaqstan, Reseı jáne Belarýs Keden odaǵy men BEK-tiń múshesi bolyp otyr. Degenmen, osynaý ıntegratsııalyq uıymnyń esigi ashyq. Qyrǵyzstan qazirdiń ózinde EEK-tiń tabaldyryǵynda tur desek te bolady. 2015 jyldyń 1 qańtaryna deıin biz ony qabyldaımyz dep senemiz. Jol kartasy jumys isteýde», - dedi Elbasy.
Sonymen qatar, Memleket basshysy atalǵan uıymdy qarjylandyrý máselesine qatysty túıtkildi máselelerdiń oryn alyp otyrǵanyn basa aıtty.
«Sońǵy jyldary barlyq memleketter ózderiniń qarjylyq mindettemelerin birdeı oryndamaı otyrǵany qupııa emes. Tek, Qazaqstan men Reseı ǵana 100 paıyz jarnalaryn engizip keledi. Eger, Qazaqstan ne bolmasa, Reseı EýrAzEQ-tan shyǵatyn bolsa, onda bul uıymnyń qyzmet etýine qatysty jalpy, másele týyndaıdy. Sondyqtan da, buǵan jol bermeı, bizderge búgin sheshim qabyldaý qajet», - dedi QR Prezıdenti.
