Eurasian Resources Group úzdik seriktesterin marapattady
ASTANA. KAZINFORM - Qalyptasqan dástúr boıynsha Eurasian Resources Group (ERG) jyl sońynda kompanııanyń úzdik bıznes-seriktesterin marapattady. Bıyl saýda baıqaýynda jeńiske jetip, ERG kásiporyndaryna ónim jetkizgen, jumys pen qyzmet usynǵan barlyq jetkizýshiler avtomatty túrde ERG Supplier Award baıqaýyna qatysady.
Olardyń qaı jerde ornalasqany mańyzdy emes. Bir anyǵy – belgilengen ár atalymda sapa men baǵa úılesimin, jetkizilim merzimderin qatań saqtap, moınyna alǵan mindetterin múltiksiz atqarǵan jetkizýshiler «jeńimpaz» bolady.
- Qazir bıznes, sonyń ishinde taý-ken metallýrgııa salasy da, geosaıası faktorlardan týyndaǵan jalpy aýmaly-tókpeli jaǵdaıda jumys istep jatyr. Sóıte tura, bizdiń satyp alynatyn taýarlar men usynylatyn qyzmetterge qoıylatyn talaptarymyz sol qalpy joǵary bolyp qalady. Seriktesti durys tańdaý tek óndiris oshaqtarynyń ornyqtylyǵy ǵana emes, «týǵan qalalarymyzdyń» bolashaǵyna da áser etedi. Baıqaýda jeńimpaz atanǵan kompanııalardyń aýqymy árqıly – óńirlik jetkizýshilerden bastap, keńinen tanylǵan halyqaralyq brendterge deıin bar. ERG Supplier Award marapaty – tek atqarylǵan iske aıtylǵan alǵys qana emes, uzaq jyldar boıǵy senimdi seriktestikke qurmet. Onyń ústine, bul nagradalardy bedeldi salalyq kórmelerden kórý – kóńil qýantady, - dedi ERG Kommertsııa ortalyǵynyń bas dırektory Rýslan Mýlıýkbaev.
Kompanııa otandyq óndirýshilerden taýar, jumys pen qyzmetterdi satyp alý úlesin turaqty túrde arttyryp keledi. 2025 jyly olardan 1,3 trln teńgeniń ónimi men qyzmetteri satyp alynǵan. Bul jalpy satyp alýlardyń 70%-nan joǵary. Bul Qazaqstannyń iri bıznesi tarapynan jergilikti óndirýshilerge senim bar ekenin ári jetkizýshiniń quzyreti joǵary ekenin pash etip tur.
Bıyl ERG ımportty almastyryp, jergilikti jerdegi óndiristiń qalyptasýyna qoldaý kórsetý úshin otandyq kásiporyndarmen ofteık-kontrakt jasasý tájirıbesin jalǵastyrdy. 2025 jyly jalpy somasy 19,1 mlrd teńgelik osyndaı kelisimsharttar jasaldy. Al 2021 men 2025 jyldar aralyǵynda jalpy somasy 55 mlrd teńgege jýyqtaıtyn 72 kelisimshart jasalǵan. Bul kompanııanyń qazaqstandyq úlesti qoldaý baǵytynda júıeli jumys istep jatqanyn kórsetedi.
Oǵan qosa, ERG naryqta uzaq merzimdi seriktestikti nyǵaıtýǵa da ekpin túsirdi. Qazaqstandyq óndirýshilermen jalpy somasy 196 mlrd teńgege 951 kelisimshart jasaldy. Salalyq qaýymdastyqtarmen ózara tıimdi áriptestiktiń arqasynda iri jobalardy iske asyrýǵa septeser senimdi jetkizýshiler pýlyn keńeıtýge jol ashyldy. Bul rette ásirese Qazaqstan mashına jasaýshylar qaýymdastyǵymen seriktestikti atap aıtýǵa bolady.
Máselen, «Promprıvod» JShS-men redýktorlar jetkizý men óndirýge qatysty kelisimshart jasaldy. Olardyń arasynda «SVS-Modýl» JShS (metall konstrýktsııalaryn ázirleý, olardy ornatý men montajdaý), «Jigermunaıservıs» JShS (jabdyqtarǵa qosalqy bólshekter jetkizý jáne júk túsirý torbasyn jetkizý), «RMMZ» JShS (jabdyqtarǵa qosalqy bólshekter) sııaqty kompanııalar da bar.
Osydan alty jyl buryn ERG Supplier Award marapatyn uıymdastyrý týraly sheshim qabyldaǵandaǵy basty maqsat – Top pen kásiporyndarynyń seriktesteri arasyndaǵy senimdi, jumysyn minsiz atqaratyn, joǵary kásibı biliktilik tanytyp júrgenderge qurmet kórsetý. Júlde – kompanııamen uzaq jyldar boıy seriktes bolyp, senimdi aqtap kele jatqandarǵa alǵys. Bastamany Toptyń taýarlar men qyzmetterdi satyp alýdaǵy biryńǵaı ortalyǵy – ERG Kommertsııa ortalyǵy usynǵan. 2016 jyly qurylǵannan beri ERG Kommertsııa ortalyǵy ERG-degi satyp alý protsesterin jetildirip, olardyń operatsııalyq tıimdiligin arttyrýǵa baǵyttalǵan bastamalardy birizdi ári júıeli iske asyryp keledi.
- 2024 jyly kompanııamyz – «Tavrıda Elektrık Astana» kásiporny «Energetıkalyq jabdyqtar» atalymynda «úzdik jetkizýshi» dep tanylǵan bolatyn. Búginde ERG – qaýipsizdik standarttary qatań, korporatıvtik etıkasy men sapasy joǵary eldegi taý-ken metallýrgııa salasynyń úzdikteriniń biri. Bıznesti qalyptastyrýdaǵy osy joǵary talaptarymyz kompanııalar arasyndaǵy seriktestigimizge negiz boldy. Biz alǵan marapat – uzaq jylǵy seriktestiktiń nátıjesi ári jumystyń durys baǵytta júrip jatqanyn aıqyn kórsetkishi, - dedi «Tavrıda Elektrık Astana» JShS satylym departamentiniń dırektory Semen Zavgorodnıı.
2025 jyly «Súzgi materıaldary» atalymynda jeńiske jetken kompanııa – «Tekstılnaıa Kompanııa «Tehnotkan» JShS quryltaıshylarynyń biri Sergeı Sychenko bylaı dedi: - Bizdiń komandamyz úshin – bul naǵyz mańyzdy marapat. «Súzgi materıaldary» atalymyndaǵy kóptegen jetkizýshiler arasynan úzdik shyǵyp, Toptyń senimdi seriktesi dep tanylý – úlken mártebe. Otandyq óndirýshiniń ónimi eń joǵary talaptar men standarttarǵa sáıkes kelgeni erekshe qýanysh. Sondyqtan, bul marapatty úlken jaýapkershilik ári ustanymdarymyzdyń durystyǵynyń rastalǵany dep bilemiz.
Bıyl, 2025 jyly, Toptyń tómendegi úzdik jetkizýshileri Supplier Award 2025 marapatynyń tómendegi atalymdarynda marapattaldy:
• «Kendi baıytý» – LONGi Magnet Co., Ltd
• «Súzgi materıaldary» – «Tekstılnaıa Kompanııa «Tehnotkan» JShS
• «Gaz tazartý qondyrǵylary» – Fujian Longking Co., Ltd
• «Kabel-ótkizgish ónimderi» – «Saranskkabel» AAQ
• «Elektrli qozǵaltqyshtar» – «Sıbırskıı elektrotehnıcheskıı zavod» AAQ
• «Tasymaldaý jabdyqtary» – «VIBRO-M» AAQ
• «Jeke qorǵanysh quraldary» – «FPG ENERGOKONTRAKT» AQ
• «Qubyr ónimderi» – «Ýralskaıa torgovo-promyshlennaıa kompanııa» JShS
• «Arqan ónimderi» – «Kaz-metiz» (Kaz-metız) JShS
• «Taý-ken uńǵylaý jumystary» – «ASS Stroy» JShS
• «Lak-syrlaý materıaldary» – «Lakra» JShS
• «Metall qurylymdary men metall ónimderi» – «EkıbastýzRemEnergoServıs» JShS
• «Rezeńke tehnıkalyq ónimderi» – «Voshod» JShS
• «Janar-jaǵarmaı» – «Avıks Grýp» JShS
• «Reaktıvter men reagentter» – Ecolab Company (Nalco Water)
• «Tot baspaıtyn tor» - «fırma «KazPromSetka» JShS
• «Jyljymaly quramdy jóndeý» – «Rýdnenskoe remontnoe depo» JShS
• «Tasymal logıstıkasy» – «Ge Logistics Group» JShS
• «Sustainability Award» – «KazAzot» AQ
• «Klımatqa jaýapkershilik» – RHI Magnesita GMBH.
Toptyń seriktesi atanǵyńyz kelse, tolymdy aqparatty resmı satylym portalynan taba alasyz torgi.erg.kz.