Etti mal sharýashylyǵyn damytý jobasy aýyl sharýashylyǵy mamandarynyń bolashaqtaǵy jumysyna qyzyqty baǵdar bolmaq - agrarlyq JOO
ASTANA. 1 aqpan. QazAqparat /Gúlmıra Álıakparova/ - Etti mal sharýashylyǵyn damytý boıynsha teńdessiz jobany júzege asyrý - aýyl sharýashylyǵy mamandarynyń bolashaqtaǵy jumysyna qyzyqty baǵdar bolmaq.
Elbasy N.Nazarbaevtyń «Bolashaqtyń irgesin birge qalaımyz» atty Joldaýyna qatysty bul pikirin S.Seıfýllın atyndaǵy Qazaq agrotehnıkalyq ýnıversıtetiniń tárbıe jáne áleýmettik máseleler jónindegi prorektory Aleksandr Maıer bildirdi.
A.Maıer, Prezıdent óz Joldaýynda qazaqstandyqtardyń ómir sapasyn odan ári arttyrý boıynsha strategııalyq mindetterdi qoıǵandyǵyn aıta kele, erekshe nazardy agrarlyq sektordy damytýǵa bólgendigin atap ótti.
«Elbasy Qazaqstanda etti mal sharýashylyǵyn damytý úshin buryn-sońdy bolyp kórmegen joba júzege asyrylatyndyǵyn aıtty. Bul eldegi aýyl sharýashylyǵy mamandarynyń bolashaqtaǵy jumysyna qyzyqty baǵdar bolady. Bul salany damytý elimizdiń azyq-túlik qaýipsizdigi ustanymdaryn bekitýge múmkindik beredi. Sondaı-aq aýylda qosymsha jumys oryndaryn quryp, Elbasy aıtpaqshy, bir-birimen sabaqtas salalarda óndiris kólemin arttyrýǵa septigin tıgizedi», - dedi ol.
Prorektor atap kórsetkendeı, N.Nazarbaev halyqqa arnaǵan óz Joldaýlarynda áleýmettik salany damytýǵa qashan da erekshe oryn berip keledi. «Áleýmettik sala nemese áleýmettik saıasat - Joldaýdyń taǵy bir «ekpindi» bóligi», - deıdi A.Maıer.
«Qazaqstandyq joǵary oqý oryndarynyń halyqaralyq reıtıngterge kirý qajettigi týraly aıtqan oıy da kóńilge qonymdy boldy. Sebebi bul qazaqstandyq bilimniń deńgeıin búkil álemge pash etýge aıqyn jol. Prezıdenttiń Qazaqstan halqyna arnaǵan Joldaýy jańa belesterdi baǵyndyrýǵa yntalandyratynyna jáne barlyq mindetter tıisti dárejede ómirge engiziletinine senimdimin», - dedi ol.
