Etti qaı óńir kóbirek tutynady

ASTANA. KAZINFORM — Bıýro 2025 jyldyń III toqsanyna arnalǵan azyq-túlik ónimderin tutyný jónindegi derekterdi jarııalady. Málimetter halyqtyń turmys deńgeıi boıynsha 11,7 myń úı sharýashylyǵyn qamtyǵan iriktemeli zertteý nátıjesinde alynǵan. 

Úı sharýashylyqtarynyń azyq-túlik tutyný shyǵysyndaǵy eń joǵary úles et jáne et ónimderine, sondaı-aq nan men jarma ónimderine tıesili, sáıkesinshe 18,3% jáne 7,6%.

— Et pen et ónimderin tutynýdyń eń joǵary deńgeıi Almaty qalasynda, sondaı-aq, Jetisý, Qaraǵandy jáne Aqmola oblystarynda baıqaldy. Bul óńirlerde bir adamǵa shaqqandaǵy ortasha tutyný kólemi toqsanyna shamamen 24 kg. Al eń tómen kórsetkish Shymkent qalasynda tirkelip, bir adamǵa shaqqanda toqsanyna 16,1 kg boldy.

Óńirler bólinisinde jekelegen azyq-túlik túrlerin tutyný deńgeıi de ártúrli. Nan men jarma ónimderin eń kóp tutynatyn óńir — Túrkistan oblysy, munda bir adamǵa toqsanyna 43,4 kg keledi. Balyq ónimderin eń kóp tutyný Soltústik Qazaqstan oblysynda baıqalyp, kórsetkish 5,8 keli. Sút jáne sút ónimderin tutyný kólemi Aqmola oblysynda joǵary — bir adamǵa toqsanyna 83,1 kg. Al kókónister men jemisterdi eń kóp tutynatyn óńir — Almaty qalasy, tıisinshe 30,76 kg jáne 36,9 kg, — delingen Ulttyq statıstıka habarlamasynda.

Jalpy alǵanda, 2025 jyldyń III toqsanynda jan basyna shaqqandaǵy azyq-túlik ónimderin ortasha tutyný kólemi kelesideı:

kartop — 11,3 kg
nan men jarma ónimderi — 31,7 kg
et jáne et ónimderi — 21,2 kg
jemister — 29,6 kg
qant, tosap, shokolad jáne kondıterlik ónimder — 11,4 kg
sút ónimderi — 60,5 kg
jumyrtqa — 53,9 dana
balyq pen teńiz ónimderi — 3,6 kg 

Aıta ketelik mektep oqýshylaryna aptasyna 2 ret jylqy eti beriletini týraly jazǵan edik.