Etti alypsatarlar qoldan qymbattatyp otyr — Jıgýlı Daırabaev

ASTANA. KAZINFORM — Májilis depýtaty Jıgýlı Daırabaev Premer-mınıstr Oljas Bektenovtiń atyna joldaǵan saýalynda ettiń kúrt qymbattaýyna ne sebep bolǵany týraly paıymyn aıtty. 

— Fermerlerdiń tabystary jóninde aıtsaq, bıyl ońtústik oblystardyń kóptegen aýdanynda qýańshylyq bolýyna baılanysty josparlanǵan ónim alynbady. Kóptegen egis alqaby orylmady. Eginshilikten paıda kórmeı, mal ónimderinen tabys tabamyz degende sıyr etiniń eksporty jabyldy.

Et baǵasynyń negizsiz qymbattaýyna birinshi kezekte fermerler emes, deldaldar men alypsatarlar sebepker ekenin ózderińiz de bilesizder, — deıdi depýtat.

Onyń aıtýynsha, mal sharýashylyqtarynda 1 kılogramm sıyr etiniń ózindik quny 2500 teńgeden aspaıdy.

— Al bólshek saýdada bul kórsetkish 5000 teńgege deıin ósip otyr. Demek, fermerlerdiń tabysy azaıyp, basty paıda alypsatarlardyń qolynda qalyp otyr. Buny retteýshi Saýda mınıstrligi men ákimder qaıda qarap otyr?

Eksportty shekteý fermerlerge aýyr soqqy bolyp tıip otyr. Fermerler bolashaqta ónimin erkin sata almaıtynyn bilse, mal basyn kóbeıtýge yntasy tómendeıdi. Bul kerisinshe, usynystyń azaıýyna jáne ishki baǵanyń odan ári ósýine alyp keledi.

Sondyqtan, ishki naryqtaǵy baǵany turaqtandyrý sharalaryn qaıta qaraýdy, deldaldar men alypsatarlardyń áreketin shekteýdi, al fermerlerge ónimin erkin ótkizýge múmkindik berýdi suraımyz, — dedi Jıgýlı Daırabaev.

Al Premer-mınıstrdiń orynbasary — Ulttyq ekonomıka mınıstri Serik Jumanǵarın et baǵasynyń tómen bolýy mal sharýashylyǵynyń damýyna teris áser etip kelgenin aıtqan edi.