ETsQ-nyń jabyq kiltin ruqsatsyz paıdalanýǵa jaýapkershilik engizilmek

ASTANA. KAZINFORM – Elektrondyq tsıfrlyq qoltańbanyń jabyq kiltin ruqsatsyz paıdalanýǵa jaýapkershilik engizilmek. Bul týraly Aqparattyq qaýipsizdik komıtetiniń tóraǵasy Rýslan Ábdiqalyqov aıtty,

Onyń atap ótýinshe, kıberqaýipsizdik salasyndaǵy jaǵdaılardyń ósýine jaýap retinde Tsıfrlyq damý mınıstrligi azamattardyń quqyqtaryn qorǵaý jáne eldiń tsıfrlyq ınfraqurylymyn nyǵaıtý úshin belsendi sharalar qabyldap jatyr. Azamattardyń shaǵymdaryna negizdelgen jospardan tys tekserýler barysynda bıometrıkalyq ıdentıfıkatsııa júıelerin ázirleýshiler men shyǵarmashylyq úıirmeler arasynda buzýshylyqtar anyqtaldy. Máselen, 3-shi toqsanda tekserýler 4 uıymdy qamtydy. Nátıjesinde ata-analardyń kelisiminsiz balalardyń bıometrııalyq derekterin zańsyz jınaýdyń 2 jaǵdaıy anyqtaldy. Tekserýlerdiń qorytyndysy boıynsha 332 280 myń teńge kóleminde jalpy somada 2 ákimshilik is qozǵaldy.

Munan bólek, mınıstrlik jeke derekterdiń taralýyna jaýapkershilikti arttyrý maqsatynda «Ákimshilik quqyq buzýshylyqtar týraly» Kodekske ózgerister engizýdi usynyp otyr. Bul ózgerister jaýapkershilik merzimin jáne buzýshylyqtarǵa salynatyn aıyppuldardy úsh esege kóbeıtýdi qamtıdy. Sondaı-aq, elektrondyq tsıfrlyq qoltańbanyń jabyq kiltin ruqsatsyz paıdalanýǵa jaýapkershilik engizý josparlanǵan.

«Mańyzdy qadam jylystap ketýdi baqylaý jáne buzýshylardy anyqtaý úshin buzylǵan derekterdiń biryńǵaı tizilimin jasaý bolady. Bul kıberqaýipsizdik salasyndaǵy oqıǵalarǵa tıimdirek jaýap berýge múmkindik beredi», - dedi Rýslan Ábdiqalyqov Ortalyq kommýnıkatsııalar qyzmetindegi brıfıngte.