ETsQ merzimi ótip ketti: SQO-da alaıaqtar aldaýdyń jańa tásilin oılap tapty
PETROPAVL. KAZINFORM – Soltústik Qazaqstan oblysynda alaıaqtar Halyqqa qyzmet kórsetý ortalyǵynyń qyzmetkerleri bolyp habarlasyp, jurtty aldap jatyr.
SQO Polıtsııa departamenti baspasóz qyzmetiniń málimetinshe, qyrkúıek aıynyń alǵashqy kúnderinen bastap kıberalaıaqtar óńir turǵyndaryna jańa tásilmen qońyraý shala bastady.
Olar ózderin HQKO nemese eGov qyzmetkerleri retinde tanystyryp, azamattarǵa elektrondyq tsıfrlyq qoltańbanyń (ETsQ) qoldanylý merzimin uzartý qajet ekenin aıtady. Áńgime barysynda telefonnyń pernetaqtasynan kelisimdi rastaý úshin «1» batyrmasyn, al bas tartý úshin «3» batyrmasyn basýdy suraıdy.
Birazdan keıin ekinshisi habarlasyp, onyń jeke kabıneti buzylǵanyn jáne atyna nesıe rásimdelgenin aıtady. Alaıaqtar jaǵdaıdy «retteýdiń» jalǵyz joly - ekinshi nesıe rásimdep, alynǵan qarajatty «qaýipsiz shotqa» aýdarý dep sendiredi.
Sońǵy kúnderi polıtseılerge osyndaı 20-ǵa jýyq qońyraý týraly aqparat kelip túsken. Bul – oblys turǵyndarynyń «102» arnasyna habarlaǵan faktileri ǵana. Jańa tásil boıynsha bir qylmys tirkeldi: oblys aýdandarynyń birinde turatyn 44 jastaǵy turǵyn alaıaqtarǵa senip, 4 mln teńgesinen aıyrylǵan.
- HQKO jáne eGov qyzmetkerleri azamattardan bank kartalarynyń derekterin, shottaǵy qarajat týraly aqparatty nemese basqa da banktik qupııa málimetterdi talap etpeıdi. Mundaı qońyraýlarǵa senbeńizder jáne bógde adamdardyń nusqaýy boıynsha nesıe rásimdep, aqsha aýdarmańyzdar, - deıdi tártip saqshylary.
Segiz aıdyń qorytyndysy boıynsha SQO-da 389 ınternet-alaıaqtyq faktisi tirkelgen. Bul ótken jyldyń sáıkes kezeńimen salystyrǵanda shamamen 24% tómen. Onyń ishinde 248 fakti turǵyndardy iri kólemde nesıe rásimdeýge kóndirgen túrli alaıaqtyq shemalarmen baılanysty.
Polıtseıler soltústikqazaqstandyqtardy QR-kod arqyly ótýge bolatyn WhatsApp messendjerindegi arnaıy topqa qosylýǵa shaqyrady. Onda tártip saqshylary ınternet-alaıaqtyqtyń keń taraǵan tásilderi týraly aqparat berip, turǵyndardyń suraqtaryna jaýap beredi.
Sonymen qatar azamattar keńes alý nemese kıberqylmys týraly habarlaý úshin +7-708-022-09-45 senim telefonyna anonımdi túrde habarlasa alady.
Buǵan deıin «SMS-blaster» arqyly 150 myń alaıaqtyq habarlama taratqan top ustalǵanyn jazǵan edik.
